Sürücülük vəsiqəsi almağın yeni qaydaları - ARAŞDIRMA

Bundan sonra sürücülük vəsiqəsi almaq istəyənlərdən tibbi arayış tələb edilməyəcək. Milli Məclisin son iclasında "Yol hərəkəti haqqında" qanuna edilən əlavə və dəyişikliklər nəticəsində yalnız yaşı 60-dan yuxarı olanlar sürücülük vəsiqəsi alarkən tibbi arayış təqdim edəcəklər.

Qanuna edilən dəyişikliyə görə, 70 yaşından sonra sürücülərə hər iki ildən bir vəsiqəsinin dəyişdirmək tələbi də qoyulub. Deputat Qüdrət Həsənquliyevsə hesab edir ki, bu tələbin qoyulması həm 70 yaşını adlayan insanlara hörmətsizlikdir, həm də ayrı seçkilikdir: "Sanki onlara deyirik ki, sən həyatını başa vurmusan. İnsanlara bu cür davranmaq olmaz. 80 yaşında adamlar var ki, cavanlardan da gümrahdır".

Texniki baxış 4 ildən sonra keçiriləcək

Sürücüləri sevindirəcək digər bir dəyişiklik isə avtomobillərin texniki baxışdan keçirilməsi ilə əlaqədardır. Belə ki, yeni maşınlar istehsal olunduqları vaxtdan ancaq 4 il keçdikdən sonra ilk dəfə texniki baxışdan keçirilməli olacaq. Sonrakı müddətdə iki ildən bir keçiriləcək. Yalnız istehsal müddətindən 10 il keçdikdən sonra hər il texniki baxış tələbi olacaq. Texniki baxış Azərbaycanın 11 regionunda həyata keçiriləcək.

Qeyd edək ki, ötən ilin oktyabrında 20-dən çox QHT rəhbəri ölkə prezidenti İlham Əliyevə müraciət edib. Müraciətdə nəqliyyat vasitələrinin dövlət texniki baxışdan keçmə sistemində islahatlar, ilk növbədə təzə avtomobillərin 3 il ərzində texniki baxışdan azad edilməsi təklif olunmuşdu.

Onu da deyək ki, yeni avtomobillər Fransa, İspaniya, Cənubi Koreya, Rusiya, Qazaxıstanda 3 il, Almaniya, Böyük Britaniya, Yaponiya, Polşada isə 2 il müddətinə texniki baxışdan azad edilirlər. Fransa və İspaniyada 3 ili tamam olandan sonra istismar müddətinin 10 ilinə qədər maşınlar 2 ildən bir texniki baxışdan keçirilir. Almaniya və Yaponiyada yalnız 11-ci ilinə keçdikdə hər il texniki baxış tələb olunur. Rusiya və Qazaxıstanda 7, Polşada 4 ildən sonra hər il avtomobillərin texniki baxışdan keçirilməsi məcburi xarakter daşıyır. ABŞ-ın 13 ştatında isə avtomobillərin texniki baxışdan keçməsi vacib deyil. Yəni bu, maşın sahiblərinin istəyindən asılıdır. Digər ştatlarda isə ya hər il, ya da 2 ildən bir bütün avtomobillər texniki baxışdan keçmək məcburiyyətindədirlər.

Ukraynada və Gürcüstanda da avtomobillərə texniki baxış ləğv edilib. Gürcüstan prezidenti Mixail Saakaşvili avtomobillərin texniki baxışının korrupsiya mənbəyi olduğunu düşünür. O hesab edir ki, avtomobil vətəndaşın və təşkilatın mülkiyyətidir və onun texniki sazlığında özü maraqlıdır, özü də qayğısına qalsın.

Sağlamlıq haqqında məlumat kartdan götürüləcək

Tibbi arayış tələbi olmadan vətəndaşlara sürücülük vəsiqəsinin verilməsinə gəlincə, Səhiyyə Nazirliyinin Səhiyyənin İnformasiyalaşdırılması Mərkəzinin direktoru Cəbrayıl Əsədzadə "Trend.az"a verdiyi məlumatda qeyd edib ki, şəxsiyyət və ya sürücülük vəsiqəsinin verilməsi zamanı tələb olunan tibbi arayışların "Vətəndaşların Elektron Sağlamlıq Kartı Sistemi"ndən alınması nəzərdə tutulur. Bununla da Səhiyyə Nazirliyinin elektron informasiya bazasında arayışla bağlı bütün məlumatlar Daxili İşlər Nazirliyinin informasiya sistemində əks olunacaq: "Vətəndaşın şəxsiyyət vəsiqəsində yer alan qan qrupu, göz rəngi kimi fərdi məlumatlar tibbi arayışdan avtomatik əldə olunacaq. Artıq kənar müdaxilə və ya proseslərə ehtiyac qalmayacaq. Sadəcə, tibbi kartların identifikasiya kodu ilə məlumatlar bizim bazadan Daxili İşlər Nazirliyin bazasına göndəriləcək. Hazırda ikitərəfli məlumat mübadiləsinin təkmilləşdirilməsi üzərində işlər davam etdirilir. Daxili İşlər Nazirliyi ilə bizim optik rabitəmiz qurulub. Biz sözügedən nazirliyin elektron informasiya bazasından şəxsiyyət vəsiqəsinin nömrəsini yazmaqla, onun sahibi ilə bağlı məlumatları, təlimatları əldə edə bilirik". Onun sözlərinə görə, elektron baza gələcəkdə respublikanın digər dövlət müəssisələrinin elektron bazaları ilə birləşdiriləcək.

Qara plyonkaya görə 150 manat cərimə

Bundan sonra pəncərəsinə plyonka vurduran sürücülər 50 manat yox, 150 manat məbləğində cərimə ediləcək. Bu haqda dünən parlamentdə İnzibati Xətalar Məcəlləsinə dəyişikliklər qəbul edildi. Həmin cərimə məbləği həm də tormoz sistemi, sükan idarə mexanizmi nasaz olan, normativ tələblər pozulmaqla avadanlığın quraşdırılmasına görə də tətbiq ediləcək.

"Yol hərəkəti haqqında" qanuna edilən digər dəyişikliyə görə, nəqliyyat vasitələrini idarə etmək hüququ olmayan şəxslər yol hərəkəti qaydalarını pozarsa, yaxud sərxoş ikən bu hallara yol verərsə, onda həmin pozuntuya görə sanksiyalar da gücləndirilir. Belə ki, bir şəxsin ölümü ilə nəticələnən qəzalar zamanı 8 ilədək, 2 və ya daha artıq şəxsin ölümünə səbəb olma zamanı 12 ilədək azadlıqdan məhrumetmə cəzasına məhkum ediləcək.

Bundan sonra maşınların pəncərəsinə qara plyonka vuran sürücülər 50 manat yox, 150 manat məbləğində cərimə ediləcək. Bu haqda İnzibati Xətalar Məcəlləsinə dəyişiklik qəbul edilib.

Milli Məclisin hüquq siyasəti və dövlət quruculuğu komitəsinin sədri Əli Hüseynli hesab edir ki. Bu qaydaların tətbiqi texniki baxış prosesinin sadələşdirilməsinə, daha da şəffaf olmasına gətirib çıxaracaq və hazırda mövcud olan əsassız bir sıra hallar aradan qalxacaq.

Kaspi.az