3 polisin öldüyü hadisə əslində necə baş verib? - Detallar açıqlandı

Sosial şəbəkələrdə Azərbaycana səs salan cinayətlə bağlı əsassız məlumatlar yayılmaqdadır. 3 polisin ölümü ilə nəticələnən hadisənin gedişatı yanlış təqdim olunaraq insanlarda çaşqınlıq yaratmaq məqsədi güdür. Polisin nüfuzunu salmaq istəyən şəxslər bu kimi paylaşımlarla cəmiyyətdə yanlış fikir formalaşdırıb hüquq mühafiçəlirin işinə kölgə salmağa çalışırlar. Bu kimi məqsədlərin həyata keçirilməsində son zamanların populyar sosial şəbəkəsinə çevrilən tiktok xüsusi yer tutur.

Ümumilikdə, bütün dünyada polisə qarşı mənfi fikir formalaşsa da, polissiz dünyanı bir gün belə düşünmək mümkün deyil. Məhz polislər sayəsində, bu gün çox insan evində rahat yatır, dərdi, problemi olanda onlardan kömək istəyir. Onlar hər dəqiqə xidmət başındadır. Polislərin gecəsi-gündüzü yoxdur. Onlar vətəndaşlarımızın təhlükəsizliyi üçün daim çalışırlar.

Azərbaycan polisi öz vəzifə borcunu yerinə yetirmək üçün, cinayətkarın ailəsini qorumaq üçün canından keçib. Onlar R.Allahverdiyevin həyatda qalmaq bahasına silahın önünə çıxardığı ailə üzvlərini qorumaq üçün qəhrəmancasına həlak olublar.

Bu hadisə göstərir ki, Azərbaycan polisi üçün mülki vətəndaşın yaşamaq hüququ, canı, təhlükəsizliyi həqiqətən də çox önəmlidir. Onlar öz canları bahasına, hətta, qatilin ailəsini belə qorumaq üçün əllərindən gələnin artığını edirlər.

Hadisə necə baş verib?

Səkkiz aya yaxın istintaq orqanlarından gizlənən Rövşən Allahverdiyevin 24 iyun 2024-cü il tarixə keçən gecə yaşadığı ünvana gələcəyi barədə məlumat almış əməliyyat xidmətinin əməkdaşı dərhal bu barədə aidiyyəti üzrə məruzə edib, həmin ünvana əlavə qüvvələr, eləcə də ərazidə xidmət aparan post-patrul naryadları göndərilmiş, ilk gələn post-patrul əməkdaşı ilə əməliyyat xidmətinin əməkdaşı Rövşən Allahverdiyevi yaşadığı ünvanın qarşısında saxlayıblar.

Oxu.az-ın əldə etdiyi məlumata görə bundan sonra Rövşən Allahverdiyev səkkiz aya yaxın azyaşlı övladlarını görmədiyini bildirib sonuncu dəfə onlarla vidalaşmasına icazə verilməsini anası ilə birlikdə israrla xahiş etdiyindən polis əməkdaşları humanizm göstərərək onun qolundan qandalı açıb yaşadığı mənzilə daxil olmasına şərait yaradıblar.

Rövşən Allahverdiyev evə daxil olduqdan sonra "Kalaşnikov" döyüş avtomatının bazası üzərində hazırlanmış, bir neçə hədəfi qısa müddətə məhv etmək imkanına malik "Lancaster" markalı ov silahı ilə ailə üzvləri - anası, həyat yoldaşı, uşaqları ilə bayıra çıxaraq onların arxasından qəfil atəş açmaqla polis əməkdaşlarını qətlə yetirmiş, eləcə də yaranmış səs-küyü eşidib həmin ünvana gələn, yaxınlıqda yaşayan, Səfər Pirvəli oğlu Piriyevin də polis əməkdaşı olmasını zənn edərək onu da qətlə yetirib.

Bundan sonra, hadisə yerinə gələn əməliyyat qrupu təslim olması barədə Rövşən Allahverdiyevi dəfələrlə xəbərdar etsələr də, sonuncu buna məhəl qoymayaraq müqavimət göstərdiyindən odlu silahdan istifadə edilməklə zərərsizləşdirilib.

Bəs Rövşən Oqtay oğlu Allahverdiyev kimdir?

Rövşən Oqtay oğlu Allahverdiyev çoxsaylı vətəndaşı aldadaraq onlara məxsus torpaq sahələrinin özəlləşdirilməsinə, onların müxtəlif orqanlarda işə düzəlməsinə köməklik edəcəyi adı ilə külli miqdarda pullarını mənimsədiyindən 2023-cü ilin mart ayında ölkə hüdudlarını Türkiyə istiqamətində tərk etməyə cəhd göstərərkən saxlanılaraq istintaq orqanlarına təhvil verilib.

Rövşən Allahverdiyevin vətəndaş Z.A.-ya məxsus torpaq sahəsini özəlləşdirmək adı ilə sonuncunun 320 000 manatını ələ keçirməsi faktı üzrə DİN-in istintaq qurumlarında Azərbaycan Respublikası Cinayət Məcəlləsinin 178.3.2-ci (dələduzluq-külli miqdarda ziyan vurmaqla törədildikdə) maddəsi ilə cinayət işi başlanılaraq Rövşən Allahverdiyev 30 mart 2023-cü il tarixdə CM-in qeyd olunan maddəsi ilə təqsirləndirilən şəxs qismində cəlb edilmiş və məhkəməsinin qərarı ilə barəsində həbs qətimkan tədbiri seçilib.

Eyni zamanda Rövşən Allahverdiyevin torpaq sahəsini özəlləşdirmək adı ilə digər vətəndaş F.A.-nın 139 000 manat pulunu dələduzluq yolu ilə ələ keçirməsi faktı üzrə 25 mart 2023-cü il tarixdə CM-in 178.2.4-cü maddəsi ilə başlanılmış cinayət işi Rövşən Allahverdiyevin barəsində istintaq edilən digər cinayət işi ilə bir icraatda birləşdirilib.

İstintaq prosesində 29 avqust 2023-cü il tarixində Rövşən Allahverdiyevin barəsində seçilmiş həbs qətimkan tədbiri müdafiə tərəfinin vəsatəti ilə Bakı şəhəri Nərimanov Rayon Məhkəməsi tərəfindən ev dustaqlığı qətimkan tədbiri ilə əvəz edilməklə həmin şəxs həbsdən azad edilib.

Bundan əlavə, Rövşən Allahverdiyevin vətəndaş K.Ə.-ni Dövlət Gömrük Komitəsinə işə düzəltmək adı ilə aldadaraq 20 000 manat pulunu dələduzluq yolu ilə ələ keçirməsi faktı ilə bağlı 28 iyun 2023-cü il tarixdə CM-in 178.2.4-cü maddəsi ilə cinayət işi başlanılmış, istintaq zamanı onun digər vətəndaş M.E.-ni də aldadaraq torpaq sahəsini özəlləşdirmək adı ilə 1 141 500 manat pulunu dələduzluq yolu ilə ələ keçirməsi müəyyən edildiyindən əməli CM-in 178.4-cü maddəsinə tövsif edilib, 9 sentyabr 2023-cü il tarixdə isə təqsirləndirilən şəxs qismində cəlb edilməklə yenidən barəsində Səbail Rayon Məhkəməsinin qərarı ilə həbs qətimkan tədbiri seçilib.

15 sentyabr 2023-cü il tarixində Bakı Apellyasiya Məhkəməsi tərəfindən təqsirləndirilən şəxs Rövşən Allahverdiyevin barəsində Səbail Rayon Məhkəməsində seçilmiş həbs qətimkan tədbiri ləğv edilərək sonuncu təkrarən həbsdən azad olunub.

Qeyd olunan faktlarla bağlı DİN-in istintaq qurumlarında aparılan cinayət işinin ibtidai istintaqı zamanı təqsirləndirilən şəxs Rövşən Allahverdiyev istintaq orqanından gizləndiyinə görə 30 oktyabr 2023-cü il tarixdə barəsində axtarış elan edilib.

İslam
Milli.Az