Nyu-Yorkda möhtəşəm "Dostluq körpüləri" konserti olacaq

ABŞ-ın Nyu-York şəhərindəki "Milli Musiqi və Qlobal Mədəniyyət Cəmiyyəti" (National Music & Global Culture Society) dünyaca məşhur "Carnegie Hall"da sabah, noyabrın 22-də "Dostluq Körpüləri" adlı möhtəşəm konsert təşkil edəcək.

Azərbaycan, türk və yəhudi bəstəkarlarının əsərləri ilk dəfə sözügedən məkanda, məşhur "Stern Auditorium"da səslənəcək.

Qurumun yaradıcısı, pianoçu Nərgiz Əliyarovanın rəhbərlik etdiyi "Milli Musiqi və Qlobal Mədəniyyət Cəmiyyəti" bu üç icmanı birləşdirmək və klassik musiqinin füsunkar dünyası vasitəsilə qlobal siyasi qeyri-sabitlik dövründə dostluq əlaqələrini möhkəmləndirmək üçün nəzərdə tutulmuş tədbir qismində "Dostluq Körpüləri"ni təqdim edəcək.

Dahi Azərbaycan bəstəkarı Fikrət Əmirovun anadan olmasının 100 illiyinə həsr olunan konsertdə dirijorun rəhbərlik etdiyi "New York International Virtuosi Orchestra" (NYIVO) ilə birlikdə beynəlxalq səviyyədə tanınmış musiqiçilər - skripkaçı Aleksandr Markov və pianoçu Nərgiz Əliyarova dirijor Fuad İbrahimovun rəhbərliyi ilə çıxış edəcəklər.

Tədbirdə "Qrammy" mükafatına nominant olmuş türk bəstəkar Faruk Kancanın "Vox in Terra" əsərinin dünya premyerası, həmçinin Fikrət Əmirov və yəhudi-azərbaycanlı bəstəkar Elmira Nəzirovanın birgə əsərləri olan "Fortepiano və orkestr üçün ərəb motivlərində konsert"in ABŞ-da premyerası olacaq.

Digər əsərlər arasında Feliks Mendelssohn (Romantik dövrün yəhudi-alman bəstəkarı), Nevit Kodalli (tanınmış türk bəstəkarı) və Corc Gershwin (görkəmli yəhudi-amerikalı bəstəkar və Nyu-York sakini) məşhur skripka konsertləri olacaq.

Paqanini Beynəlxalq Skripka Müsabiqəsinin qızıl medallı laureatı Aleksandr Markov 16 yaşında Karnegi Hollda solo debütü edib. Uşaq ikən Moskvada atasından skripka dərsləri alıb. O, səkkiz yaşında artıq atası ilə duet konsertlər verirdi.

O vaxtdan bəri o, dünyanın ən məşhur orkestrləri və dirijorları ilə solist kimi çıxış edib. 1987-ci ildə o, nüfuzlu "Avery Fisher Career Grant" mükafatına layiq görülüb. Onun əfsanəvi klassik kinorejissor Bruno Monsaingeon tərəfindən çəkilmiş "Paganini's Caprices" videoklipi YouTube-da milyonlarla baxış toplayıb və dünya klassik musiqi ictimaiyyətində standart hesab olunur.

Nərgiz Əliyarova Nyu-Yorkda yaşayan, beynəlxalq aləmdə tanınan azərbaycanlı pianoçu və professordur. Doqquz yaşında ilk konsertindən bəri Əliyarova həm solist, həm də kamera və simfonik orkestrlərlə dünyanın 40-dan çox şəhərində çıxış edib.

N. Əliyarova 2008-ci ildə Polşa hökuməti tərəfindən "Şopen irsinə müstəsna töhfəsinə görə" 2010-cu ildə mükafat alıb. O, iyirmi beş il Bakı Musiqi Akademiyasında professor kimi dərs deyib. N.Əliyarova bir neçə kitabın və 20-dən çox elmi məqalənin müəllifi, habelə Milli Musiqi və Qlobal Mədəniyyət Cəmiyyətinin təsisçisi və prezidentidir.

Fuad İbrahimov dirijor kimi gənc karyerasında Kral Filarmonik Orkestri (İngiltərə), Orchester Symphonique de Mulhouse (Fransa), Şimali Çexiya Filarmoniyası, MDR Leipzig Simfonik Orkestri, Staatskapelle Halle, Göttingen və Göttingen kimi orkestrlərdə çıxış edib.

2012-ci ildə Gürzenich Orkestri (Almaniya) ilə Köln Operasında qonaq dirijor kimi ilk müstəqil opera quruluşunu gerçəkləşdirib. 2018-ci ildə isə Parisdə keçirilən Yevgeni Svetlanov adına Beynəlxalq Dirijorlar Müsabiqəsinin qalibi olan İbrahimov qısa müddət sonra Rostropoviç Festivalında Monte-Karlo Filarmonik Orkestrinə, Varsoviya Orkestrinə və Orchester d'Overgne dirijorluğu ilə tanındı. İbrahimov 2014-cü ilin noyabr ayından Azərbaycan Dövlət Simfonik Orkestrinin dirijoru, Münhen Yeni Filarmonik Orkestrinin və Bakı Kamera Orkestrinin baş dirijorudur.

Milli Musiqi və Qlobal Mədəniyyət Cəmiyyəti (NMGCS) qeyri-kommersiya təşkilatıdır və dünyanın hər yerindən musiqinin təbliği vasitəsilə multikultural cəmiyyətimizi birləşdirməyi hədəfləyir. NMGCS klassik musiqi vasitəsilə icmaları qlobal və çoxmillətli mədəniyyətə bağlamaq üçün körpü rolunu oynayır.

Milli.Az