Bollivud klassikası zamana meydan oxuyur: 30 ildir kinoteatrlarda göstərilir

Rejissor Aditya Çopranın ilk filmi olan "Cəsur ürək gəlinini alır" (Dilwale Dulhania Le Jayenge - DDLJ), premyerasından 30 il keçməsinə baxmayaraq hələ də Hindistan kinoteatrlarda nümayiş olunur.

Milli.Az xəbər verir ki, filmdə baş rolları Bollivud ulduzları Şah Rux Xan və Kacol canlandırır.

20 oktyabr 1995-ci ildə nümayiş olunan bu romantik film, zamanla Bollivudun ən sevilən əsərlərindən birinə çevrildi. Hadisələr Böyük Britaniyada yaşayan iki gənc hindli - Rac və Simranın Avropa səfəri zamanı tanış olması ilə başlayır. Rac, sevdiyi qızla evlənmək üçün onun atasının razılığını da qazanmağa çalışır.

Filmin populyarlığı o qədər böyükdür ki, Mumbaydakı Maratha Mandir kinoteatrı 30 ildir filmi fasiləsiz göstərməyə davam edir.

50 yaşlı almaz ustası Sunil Şedje filmi demək olar ki, hər gün izlədiyini deyir:

"Bəzən ağlayıram, çünki bu film həm sevinc, həm kədər doludur. Belə bir film bir daha çəkilməyəcək."

Kinoteatra gələn gənc cütlüklərdən Vaişnavi Deşmux, filmi "ən gözəl sevgi hekayəsi" kimi dəyərləndirərək, neçə dəfə izlədiyini xatırlamadığını deyib.

Filmin 30 illiyi münasibətilə Variety jurnalına danışan Şah Rux Xan, illərin necə keçdiyinə inanmadığını bildirib:

"Rac obrazını canlandırdığım üçün dünyanın hər yerindən gördüyüm sevgi mənə böyük minnətdarlıq hissi bəxş edir. Heç kim bu filmin bu qədər insanın ürəyinə işləyəcəyini gözləmirdi. Mənimlə tanış olan bir çox cütlük bu filmi izlədikdən sonra aşiq olub evləndiyini deyir. ."

Filmdə Simran rolunu canlandıran Kacol isə filmin uğurunu "yuxu kimi" adlandırıb:

"Mənim üçün Simran bitməyən bir fəsildir. O, bu ölkədəki milyonlarla qızı təmsil edir - ənənə ilə azadlıq arasında qalan, valideynlərinin sözünü yerinə yetirmək istəyən gənc qızları. Elə buna görə də film bu gün də insanların qəlbinə toxunur."

Lalə Qüdrətova
Milli.Az