"Şərəfin, namusun varsa, özünü as!" - Sarqsyandan Paşinyana

Ermənistanın sabiq prezidenti Serj Sarqsyan bəyan edib ki,  ölkənin baş nazir səlahiyyətlərini icra edən Nikol Paşinyanın zərrə qədər ləyaqəti varsa, intihar etməlidir.

Milli.Az Ermənistan mediasına istinadən bildirir ki, S.Sarqsyanın sözlərinə görə, əgər Nikol Paşinyanın ona qarşı səsləndirdiyi iddialar və ittihamlar boşboğazlıqdır.

"Deyir ki, guya Monte-Karloya yollanaraq kazinoda qumar oynamışam. Prezident olduğum dönəmdə də belə sarsaq ittihamlar səslənirdi. O zaman cavab vermirdim, baş qoşmurdum, çünki dövlət başçısı idim. Ermənistan Milli Təhlükəsizlik Xidməti mənə tabe idi və siyasi rəqiblərim o dəqiqə deyərdilər ki, informasiyanı gizlədirəm, təzyiq göstərirəm və s. Amma Paşinyan bu dəfə bütün hədləri keçib. İndi, bu dəqiqə, burada bəyan edirəm: Paşinyana 24 saat vaxt verirəm. Ya o, qumar oynamağım barədə faktları, dəlil-sübutları açıqlamalıdır, ya da mən onunla, ailəsi ilə bağlı elə faktlar yayacağam ki, cəmiyyət Paşinyanın üzünə tüpürəcək. Faktları açıqlamasa axırına çıxacağam. Hələ Baden-Badendən də danışırlar, amma bilmirlər ki, o şəhərdə sonuncu kazino 19-cu əsrdə qapadılıb. Monte-Karloda isə 15 ildir olmamışam. Bunu asanlıqla yoxlamaq olar. Paşinyan hamını özünə görə ölçür.  Ona deyirəm: şərəfin, namusun varsa, özünü as", - Serj Sarqsyan söyləyib.

Xatırladaq ki, Ermənistanın baş naziri səlahiyyətlərini icra edən Nikol Paşinyan seçkiqabağı təbliğat kampaniyası çərçivəsində Arvamir vilayətində vətəndaşlarla görüşündə deyib:

"O deyir ki, əgər Ali Baş Komandan olsaydı, özünü vurub intihar edərdi. Bəs son on ildə Ermənistanın satın aldığı silah, sursat və hərbi texnikanın 75 faizinin səndən sonra əldə etdiyimizi nəzərə alsaq, Sarqsyan, sən niyə indiyədək intihar etməyibsən?! Ölkənin müdafiə qüdrətini artırmaq, ordunu gücləndirmək Monte-Karloya gedib kazinoda qumar oynamaq, çoxlu pul uduzmaq deyil".

Orxan Hun
Milli.Az