Misirin "The Daily News Egypt" qəzetində "Azərbaycanın müstəqilliyi: nailiyyətlər və perspektivlər" adlı məqalə dərc edilib

Azərbaycanın dövlət müstəqilliyinin bərpasının 20-ci ildönümü münasibətilə Misirin nüfuzlu "İnternational Herald Tribune" qəzetinin regional nəşri olan "The Daily News Egypt" qəzetində ölkəmizin səfiri Şahin Abdullayevin "Azərbaycanın müstəqilliyi: nailiyyətlər və perspektivlər" adlı məqaləsi dərc edilmişdir.

Azərbaycanın Misirdəki səfirliyindən AzərTAc-a bildirmişlər ki, 1991-ci il oktyabrın 18-də "Azərbaycan Respublikasının müstəqilliyi haqqında Konstitusiya Aktı"nın qəbul edildiyinin vurğulandığı məqalədə diplomat Şərqin ilk respublikası olan Azərbaycan Xalq Cümhuriyyətinin (AXC) varisi kimi ölkəmizin müstəqilliyini bərpa etdiyini, beynəlxalq aləmə inteqrasiya yolunda inamla irəliləyərək qısa müddətdə BMT-yə və ATƏT-ə üzv olduğunu diqqətə çatdırmışdır. Səfir Azərbaycanın tarixən tərkib hissəsi olduğu və birgə irsi bölüşdüyü islam ölkələri ilə də əlaqələrini bərpa etdiyini və qarşılıqlı faydalı münasibətlər qurduğunu bildirmişdir.

Məqalədə Ermənistanın Azərbaycana hərbi təcavüzü nəticəsində torpaqlarımızın 20 faizinin işğal edilməsi, həmin ərazilərdə zəngin islam maddi mədəniyyət abidlərinin və məscidlərin viran olunması barədə oxuculara ətraflı məlumat verilmişdir.

Bildirilmişdir ki, belə bir ağır vəziyyətdə xalqımızın təkidli tələbi ilə hakimiyyətə qayıdan ulu öndər Heydər Əliyevin müdrik və uzaqgörən siyasəti sayəsində Azərbaycan qısa müddətdə bütün təhlükələrdən xilas olmuş, davamlı inkişaf mərhələsinə qədəm qoymuşdur. Səfir ümummilli lider Heydər Əliyevin yürütdüyü siyasət nəticəsində hakimiyyətin gücləndiyini, xarici əlaqələrin genişləndiyini, Ermənistan ilə atəşkəsin əldə olunduğunu, ölkədə genişmiqyaslı demokratikləşmə prosesinin başlandığını, "Əsrin müqaviləsi"nin imzalanması ilə Azərbaycanın yeni neft strategiyasının əsasının qoyulduğunu oxucuların diqqətinə çatdırmışdır. Qeyd olunmuşdur ki, ölkədə aparılan demokratikləşmə sahəsində görülən işlərin bariz nəticəsi kimi, Azərbaycan Avropa Şurasına üzv qəbul edilmişdir.

Ümummilli lideri Heydər Əliyevin siyasi irsinə sadiq qalan Prezident İlham Əliyevin rəhbərliyi ilə respublikamızın bu gün dünyada ən sürətlə inkişaf edən ölkələrdən biri olduğunu qeyd edən Ş.Abdullayev Azərbaycanın neft-qaz ixrac kəmərləri şəbəkəsi ilə Şərq-Qərb enerji dəhlizində və Avropanın enerji təhlükəsizliyində aparıcı rol oynadığını vurğulamışdır.

Diplomat ölkəmizin mədən sənayesində şəffaflıq təşəbbüsünü fəal şəkildə dəstəkləyən dövlətlərdən olduğunu qeyd etmiş, gənclər siyasəti, elm-təhsil və "qara qızıl"ın insan kapitalına çevrilməsi istiqamətində həyata keçirilən ardıcıl tədbirlər barəsində məlumat vermişdir.

Azərbaycanda qeyri-neft sektorunun inkişafı və sənayeləşmə istiqamətində görülən məqsədyönlü tədbirlərə toxunan Ş.Abdullayev 2003-cü il ilə müqayisədə 2009-cu ildə Azərbaycanda yoxsulluğun 49 faizdən 9 faizədək azaldığını diqqətə çatdırmışdır.

Məqalədə Azərbaycanın nəqliyyat infrastrukturunun, informasiya-kommunikasiya texnologiyaları sektorunun inkişafı, biznes mühitinin daha da yaxşılaşdırılması sahəsində regional mərkəzə çevrilməsi haqqında ətraflı məlumat verən səfir ölkəmizin bu gün beynəlxalq humanitar və sülhməramlı əməliyyatlara töhfə verən dövlət olduğunu qeyd etmişdir. Diplomat BMT Təhlükəsizlik Şurasının 2012-2013-cü illər üzrə qeyri-daimi üzvlüyünə namizəd olan Azərbaycanın seçildiyi təqdirdə, humanitar yardım siyasətini daha fəal şəkildə davam etdirəcəyini vurğulamışdır.

Azərbaycanın müstəqilliyinin əbədi və dönməz olduğunu qeyd edən səfir ölkəmizi daha böyük perspektivlərin gözlədiyini oxucuların diqqətinə çatdırmışdır.

Milli.Az