Siyasət

Macarıstanın aparıcı turizm jurnalında Azərbaycanla bağlı məqalə dərc olunub

17 May 2012 14:07

Baxış: 1 205

#MAGAZİN UNİVERSAL MARAMURES S.A.

Macarıstanın aparıcı turizm jurnalı sayılan "Vilagjaro Magazin"in 2012-ci ilin aprel buraxılışında Azərbaycanla bağlı çoxsaylı şəkillərin yer aldığı "Qayaüstü rəsmlər və göydələnlər" adlı böyük məqalə dərc olunub, jurnalın üz qabığında isə Bakının memarlıq simasında tarixlə müasirliyin vəhdətini əks etdirən maraqlı fotoşəkil yerləşdirilib. Bu barədə Trend-ə Azərbaycanın Macarıstandakı səfirliyindən məlumat verilib.

Jurnalda yayımlanan fotolar ötən il Azərbaycana səfər etmiş Macar Coğrafiya Cəmiyyətinin üzvü, tədqiqatçı-səyyah, jurnalist və fotoqraf Qoqoş Norbertə məxsusdur.

"Vilagjaro" jurnalının təşkilatçılığı ilə mayın 15-də macarıstan Coğrafiya Cəmiyyətinin binasında jurnalın aprel buraxılışının təqdimatı keçirilib. Təqdimatda Norbert çıxış edərək Azərbaycana səfəri zamanı çəkdiyi foto və slaydları nümayiş etdirib, ölkəmizin coşqun iqtisadi inkişafı, zəngin tarixi abidələri və təkrarsız təbiəti barəsində iştirakçılara ətraflı məlumat verib.

Səfirliyin müşaviri Anan İmanov öz çıxışında ölkələrimiz arasında günü-gündən daha da genişlənməkdə olan siyasi, iqtisadi və humanitar əlaqələr barəsində, habelə Azərbaycanın zəngin turizm imkanları və potensialı haqqında məlumat verib. O, eyni zamanda erməni işğalı altındakı Azərbaycan ərazilərindəki tarixi abidələrə və təbiətə vurulan dəhşətli ziyandan bəhs edib, macar turistləri işğal bölgəsinə səfər etməkdən çəkinməyə çağırıb.

Norbert Azərbaycana ötənilki səyahətindən sonra Macarıstanın müxtəlif mətbuat orqanlarında ölkəmiz haqqında məqalələr dərc etdirib, habelə turizmlə bağlı müxtəlif nəşrlərdə Azərbaycanın turizm potensialını işıqlandırıb. Yaxın günlərdə onun rəhbərliyi altında 20 nəfərlik macar turist qrupu ölkəmizə yola düşəcək.

Milli.Az