Molla əmiyə nifrət bəyanı: "Sən cəlladsan!"

Molla rejiminin ali dini lideri Əli Xameneinin bacısı və bu rejimi tənqid edən ruhani Əli Tehraninin xanımı Bədri Hüseyni Xamenei açıq məktub yayaraq, qardaşının və onun avtoritar xilafətinin əleyhinə olduqlarını bəyan edib.

İran hökumətini tənqid etdiyi üçün hazırda həbsdə olan qadın haqları fəalı Fəridə Muradxaninin anası Bədri Hüseyni Xamenei dekabrın 6-da dərc olunan məktubunda son 40 ildə övladlarını itirən gözüyaşlı analara xitabən yazıb:

"Qardaşımın əməllərinə haqq qazandırmamaqla yanaşı, Xomeyni dövründən tutmuş indiki Əli Xameneinin despotik xilafət dövrünə qədər İran rejiminin cinayətlərinə görə ağlar qalan bütün analara başsağlığı verirəm".

Bədri Xameneninin məktubunu qardaşı oğlu Mahmud Muradxani Twitter hesabında yayıb.

Məktubda daha sonra deyilir:  "Bütün iranlı yaslı analar kimi, mən də övladımdan uzaq olmağın kədərini yaşayıram. Rejim qızımı zorakılıqla həbs edirsə, deməli, başqalarının məzlum oğul və qızlarına min qat artıq zorakılıq tətbiq edir".

Bədri Xamenei qardaşının "avtoritar hakimiyyətini" pisləyib və xalqın nifrət etdiyi hakimiyyətin sonunun çatdığını vurğulayıb. O, tezliklə İranda tiraniyanın devrilməsini görəcəyinə ümid edir.

Açıq məktubda o, Xomeyni və onun varisi Xamenei rejiminin "iranlılara əzab və zülmdən başqa bir şey gətirmədiyini" bildirib: "Qardaşım İran xalqının səsinə qulaq asmır və yalandan öz muzdlularının və pula meyilli insanların səsini İran xalqının səsi adlandırır. Halbuki xalq bu insana deyir: "Sən cəlladsan!"

İranın ali dini lideri ayətullah Əli Xameneinin qardaşı qızı, ölkənin tanınmış hüquq müdafiəçilərindən olan Fəridə Muradxani is bir müddət əvvəl həbs edilmişdi.

O, ölkədəki genişmiqyaslı etiraz aksiyalarını dəstəkləmiş, repressiyalara qarşı çıxmışdı.

Bədri Hüseyni Xamenei İranın tanınmış din xadimlərindən və müxalifətçilərindən olmuş Əli Tehraninin dul xanımıdır.

Onun övladları Fəridə və Mahmud Muradxanilər Tehran respublikasındakı mövcud əxlaqsız hakimiyyətə qarşı sərt müxalifətdədirlər.

Orxan Hun
Milli.Az