Kulinariya

Süd mürəbbəsi resepti

10 İyul 2026 00:38

Baxış: 17 925

VTB-də minimal faiz dərəcəsi ilə nağd kredit 9.9%-dən

#KULİNARİYA

Yalnız bir neçə ərzaqla hazırlanan süd mürəbbəsi qatı teksturası və karamelə bənzər ətri ilə həm səhər yeməklərinin, həm də şirniyyatların vazkeçilməzidir. Evdə asanlıqla hazırlaya biləcəyiniz tam qvamında süd mürəbbəsi reseptini təqdim edirik:

Milli.Az xəbər verir ki, latın dilində "Dulce de Leche" olaraq bilinən bu ləzzət xüsusilə Cənubi Amerika mətbəxində çox məşhurdur. Süd və şəkərin uzun müddət vam odda bişirilməsi ilə hazırlanan bu xüsusi mürəbbə səhər yeməyində çörəyin üzərinə yaxaraq yeyə, həmçinin tort, krep, pankek və peçenyelərinizdə istifadə edə bilərsiniz.

Süd mürəbbəsi üçün lazım olan ərzaqlar:
1 litr tam yağlı süd

2 stəkan toz şəkər

1 çay qaşığı çay sodası (karbonat)

1 paket vanil (istəyə bağlı)

Hazırlanma qaydası:
Geniş bir qazana südü və şəkəri əlavə edin. Şəkər tamamilə əriyənə qədər qarışdırın.

Qarışıq qaynayıb köpüklənməyə başlayanda içərisinə sodanı (karbonatı) əlavə edin. Soda əlavə edildikdə süd köpürəcəyi üçün qazanın daşmamasına diqqət yetirin.

Ocağın altını çox azaldın (vam oda qoyun) və arabir qarışdıraraq təxminən 1,5-2 saat bişirin.

Qarışıq qatılaşıb açıq karamel rəngini alanda vanili əlavə edib bir neçə dəqiqə daha qarışdırın.

Mürəbbə qaşığın arxasını örtəcək qvama gəldikdə ocaqdan götürün.

Otaq temperaturunda soyudun. Soyuduqca qvamı daha da qatılaşacaq.

Tam soyuduqdan sonra şüşə bankaya keçirib soyuducuda saxlaya bilərsiniz.

Nuş olsun!

Müəllif: Ülkər Vəliyeva (Milli.Az redaktor)