Televizordan 20 dəfə çox işıq pulu YAZIR: 2 cihaz sayğacı "uçurdur"

Elektrik enerjisinin bahalaşması bir çox ailəni xərclərə yenidən baxmağa məcbur edir. Əksəriyyət qənaəti yalnız işıqları söndürməkdə görür. Halbuki evdə ən böyük enerji itkisi çox vaxt diqqətdən kənarda qalan cihazlardan qaynaqlanır. Araşdırmalar göstərir ki, bəzi məişət texnikası televizordan dəfələrlə çox elektrik sərf edir.

Texniki göstəricilərə görə, ən çox enerji xərcləyən cihazlardan biri kondisionerdir. Müasir modellər iş rejimindən asılı olaraq 500-dən 4000 vata qədər elektrik sərf edə bilir. Bu isə adi televizorun istehlak etdiyi enerjidən təxminən 20 dəfə çox sayılır. Xüsusilə qış aylarında isitmə rejimində işlədilən kondisionerlər aylıq elektrik ödənişlərinin artmasında əsas paya sahib olur.

Mətbəxdə isə ən çox enerji sərf edən cihaz elektrik sobası hesab olunur. Yüksək temperaturu sabit saxlamaq üçün soba saat ərzində təxminən 2-5 kilovat enerji istifadə edir. Üstəlik, bir çox model gözləmə rejimində qaldıqda belə müəyyən miqdarda elektrik sərf etməyə davam edir.

Evdəki cihazları dəyişmədən də elektrik xərclərini azaltmaq mümkündür. Bunun üçün bir neçə sadə vərdiş kifayət edir.

Kondisionerdə temperaturu cəmi 1-2 dərəcə dəyişmək enerji sərfiyyatını təxminən 10 faiz azalda bilər. Filtrlərin mütəmadi təmizlənməsi də cihazın daha səmərəli işləməsinə kömək edir.

Elektrik sobasından istifadə zamanı yeməyin bişməsinə bir neçə dəqiqə qalmış cihazı söndürmək tövsiyə olunur. Qalan istilik yeməyin tam bişməsi üçün kifayət edir və əlavə enerji sərfi azalır.

Soyuducunun arxa hissəsində yerləşən barmaqlıqların tozdan təmizlənməsi də mühüm sayılır. Bu, cihazın daha az enerji ilə işləməsinə şərait yaradır.

Paltaryuyan maşınlarda isə ən çox enerji suyun qızdırılmasına sərf olunur. Buna görə də mümkün olduqda aşağı temperatur rejimindən istifadə etmək elektrik xərclərini azalda bilər.\\Demokrat.az 

Milli.Az