Niyə 19 yanvar ilin ən pis günü hesab edilir?

Yanvar ayının 19-u dünyada "ilin ən depressiv günü" kimi tanınır. Bu tarix "Mavi Bazar ertəsi" (Blue Monday) adlanır və bir çox ölkədə insanların özlərini daha halsız, motivasiyasız və kədərli hiss etdikləri gün kimi qəbul olunur.

Milli.Az xəbər verir ki, "Mavi Bazar ertəsi" anlayışı ilk dəfə 2005-ci ildə bir turizm şirkətinin marketinq kampaniyası çərçivəsində ortaya çıxıb. Məqsəd insanları qış aylarının yaratdığı ruh düşkünlüyündən uzaqlaşdırmaq və tətilə həvəsləndirmək olub. Zamanla bu anlayış geniş yayılıb və bir çox insan tərəfindən real psixoloji hal kimi qəbul edilib.

Bu tarix hava şəraiti, Miladdan sonrakı maliyyə çətinlikləri, Yeni il qərarlarının pozulması, motivasiyanın azalması və gün işığının azlığı kimi amillər əsasında "elmi düstur" adı verilən, lakin elmi əsaslara söykənməyən bir hesablamayla müəyyən edilib. "Mavi Bazar ertəsi" hər il yanvarın üçüncü bazar ertəsinə təsadüf edir. 2026-cı ildə bu tarix 19 yanvar Bazar ertəsi gününə düşür.

Maraqlıdır ki, 19 yanvar tarixi tarix boyu da bir sıra dramatik hadisələrlə yadda qalıb.
1520-ci ildə İsveç müstəqillik ordusu Osund gölündə Danimarka qüvvələri tərəfindən məğlub edilib və üsyanın lideri Sten Sture ağır yaralanıb.
1817-ci ildə Xose de San-Martin Çilinin müstəqilliyi uğrunda And dağlarını keçərək orduya rəhbərlik edib.
1915-ci ildə Alman dirijablları ilk dəfə Böyük Britaniya ərazisini bombalayıb.
2023-cü ildə isə doqquz Avropa ölkəsi Ukraynaya hərbi dəstək məqsədilə "Tallin bəyannaməsi"ni imzalayıb.

Psixoloqlar bildirirlər ki, "Mavi Bazar ertəsi" anlayışına inanmaq və ya inanmamaqdan asılı olmayaraq, qış aylarında yaşanan emosional enişlərin müvəqqəti olduğunu anlamaq vacibdir. Sadə özünütənzimləmə üsulları, sosial ünsiyyət və fiziki aktivlik bu dövrü daha rahat keçirməyə kömək edə bilər.

Mütəxəssislər xəbərdarlıq edirlər: əgər apatiya, ümidsizlik və depressiv əlamətlər bir neçə həftə davam edərsə, mütləq mütəxəssisə müraciət edilməlidir. Depressiya zəiflik deyil, diqqət və dəstək tələb edən ciddi bir vəziyyətdir.

Milli.Az