Evdə pişik saxlayanların nəzərinə - İflic riski var

ABŞ-nin Miçiqan Universitetinin tanınmış nevroloqu Dr. Baibing Çen pişik cırmaqlaması ilə bağlı az bilinən, lakin ciddi sağlamlıq problemlərinə səbəb ola biləcək təhlükələr barədə xəbərdarlıq edib.

Milli.Az dailymail-ə istinadla bildirir ki, o, pişiklərin daşıya biləcəyi bakteriyaların insanlarda nadir hallarda ağır xəstəliklər yarada biləcəyini diqqətə çatdırıb.

Dr. Çen bildirib ki, pişiklərin cırmaqları, dişləməsi və hətta açıq yara üzərinə yalaması insanlarda "pişik cırmağı xəstəliyi" adlanan bakterial infeksiyaya yoluxa bilər. Bu xəstəlik adətən uşaqlarda və yeniyetmələrdə daha çox müşahidə olunur.

Nevroloq xatırladıb ki, bir yeniyetmə qızda qəfil baş verən qarışıqlıq, şiddətli baş ağrısı, görmə zəifliyi və yeriməkdə çətinlik yaranmışdı. Ailəsi onun daimi yorğunluq və koordinasiya pozuntusundan şikayət edirdi. Həkimlər ilkin olaraq insult, menenjit və autoimmun xəstəliklər kimi ümumi səbəbləri istisna etsələr də, qızın qolundakı cırmaqlar diqqətlərini çəkdi. Ailə son vaxtlar balaca pişik sahibləndiyini bildirib və nəticədə diaqnoz pişik cırmağı ilə əlaqəli idi.

Mütəxəssislər bildirir ki, bu infeksiya adətən limfa düyünlərinin şişməsi, qızdırma, yorğunluq kimi yüngül simptomlarla keçir, lakin nadir hallarda sinir sistemi, gözlər, qaraciyər, dalaq, beyin, sümüklər və ürək kimi həyati orqanlara təsir göstərə bilər.

Dr. Çen xəbərdarlıq edib ki, pişiklə təmasdan sonra yaranan cırmaqlar diqqətlə təmizlənməli, hər hansı baş ağrısı, görmə pozuntusu, qarışıqlıq, qızdırma və limfa düyünlərinin şişməsi kimi simptomlar yaranarsa, dərhal həkimə müraciət edilməlidir.

O, həmçinin imuniteti zəif olan şəxslərin - xərçəng xəstələri, yaşlılar və ya HIV daşıyıcılarının daha çox risk altında olduğunu vurğulayıb. Pişiklərin evdə saxlanılması və küçə pişikləri ilə təmasın azaldılması infeksiya riskini azalda bilər.

Nevroloqun xəbərdarlığı iyun ayında Böyük Britaniyada quduzluq virusu səbəbilə qadının həyatını itirməsi və heyvanlardan keçən xəstəliklərə qarşı artan narahatlıqlar fonunda verilib. Mütəxəssislər heyvanlarla təmas zamanı gigiyena qaydalarına ciddi riayət edilməsini tövsiyə edir.

İsmayıl
Milli.Az