Sabah bu universitetlərdə dərslər onlayn olacaq - yenilənib

21:56

Ölkə ərazisində müşahidə olunan qarlı hava şəraiti ilə bağlı sabah bəzi ali təhsil müəssisələrində dərslərin ləğvi və ya onlayn formata keçirilməsi ilə bağlı məlumatlar yayılıb.

Trend sözügedən məsələ ilə bağlı Bakıda yerləşən universitetlərə sorğu ünvanlayıb.

Azərbaycan İqtisad Universitetinin (UNEC) ictimaiyyətlə əlaqələr şöbəsinin müdiri Elnarə Ömərova Trend-ə açıqlamasında qeyd edib ki, sabah (24 fevral) universitetdə dərslər onlayn formatda keçiriləcək.

Azərbaycan Dillər Universitetinin (ADU) mətbuat xidmətinin rəhbəri Cavid Zeynallı bildirib ki, hava şəraiti ilə bağlı dərslərin onlayn formata keçirilməsi nəzərdə tutulmur.

"İkinci növbənin üçüncü saatının başqa bir vaxta keçirilməsi nəzərdən tutulur",- deyə o qeyd edib.

Azərbaycan Texniki Universitetinin (AzTU)mətbuat katibi Sevinc İsgəndərova vurğulayıb ki, hava şəraiti ilə əlaqədar olaraq sabah bütün dərslər onlayn formatda həyata keçiriləcək.

Azərbaycan Dövlət Neft və Sənayə Universitetinin məlumatına əsasən, sabah qarlı hava şəraiti ilə əlaqədar bütün dərslər onlayn şəkildə keçiriləcək.

Türkiyə-Azərbaycan Universitetinindən də həmçinin əlavə edilib ki, 24 fevral tarixində dərslər onlayn formada davam edəcək.

Azərbaycan Dövlət Pedaqoji Universitetinin (ADPU) mətbuat katibi Taleh Mirzəyev bildirib ki, hava şəraitini nəzərə alaraq, ADPU rəhbərliyinin qərarı ilə 24 fevral 2025-ci il tarixində universitetdə dərslər və işlər məsafədən (onlayn) Microsoft teams platforması üzərindən həyata keçiriləcəkdir.

Eyni zamanda Azərbaycan Memarlıq və İnşaat Universitetinin (AZMİU) mətbuat katibi Nicat Abdullayev Trend-ə bildirib ki, sabah dərslərin onlayn formatda keçirilməsi ilə bağlı qərar verilib.

Həmçinin Sumqayıt Dövlət Universiteti və Bakı Slavyan Unibersitetində də dərslər onlayn keçiriləcək.

----------
20:44

Sabah qarlı hava şəraiti ilə əlaqədar bir çox ali təhsil müəssisəsində dərslər onlayn formatda keçiləcək.

APA-nın xəbərinə görə, sabah Xəzər Universiteti, Azərbaycan Texniki Universitet, Sumqayıt Dövlət Universiteti, Türkiyə-Azərbaycan Universiteti, Bakı Mühəndislik Universiteti, UNEC, Azerbaycan Pedaqoji Universitetlərində, Baki Slavyan Universitetində dərslər onlayn keçiriləcəcək.

Elm və Ali Təhsil üzrə Dövlət Agentliyi məlumatı təsdiqləyib.

Universitetlərin mətbuat xidmətlərindən isə bildirilib ki, qarlı hava şəraiti ilə əlaqəli olaraq sabah dərsə gələ bilməyən tələbələrə güzəşt ediləcək.

Dərsə gəlmiş qruplara isə universitetlərdə dərs həmişəki qaydada təşkil ediləcək.

------------
20:25

Sabah UNEC və AzTU bütün dərslər onlayn formatda keçiriləcək.

Milli.Az xəbər verir ki, bu barədə universitetlər məlumat paylaşıb.

Qeyd edək ki, artıq Sumqayıt Dövlət Universiteti (SDU) də sabah dərslərin onlayn formatda keçiriləcəyini açıqlayıb.

Milli.Az