Azərbaycanın Rusiyaya qeyri-neft ixracı artıb

Bu ilin yanvar-iyul aylarında Azərbaycanla Rusiya arasında ticarət əməliyyatlarının həcmi 2,110 milyard ABŞ dolları təşkil edib.

Milli.Az Trend-ə istinadən xəbər verir ki, Dövlət Gömrük Komitəsinin hesablamasına görə, bu, 2025-ci ilin eyni dövründəki göstərici ilə müqayisədə 960 milyon ABŞ dolları və ya 31,3% azdır.

Azərbaycanın ticarət dövriyyəsində 7,22% paya malik Rusiya ölkənin ən böyük ticarət tərəfdaşları arasında 5-ci pillədə qərarlaşıb.

Bu ilin yanvar-iyul aylarında Azərbaycandan Rusiyaya 749,5 milyon dollarlıq məhsul ixracı qeydə alınıb. Bu, ötən ilin eyni dövrü ilə müqayisədə 28,4 milyon ABŞ dolları və ya təqribən 3,9% çoxdur. Bu göstərici ilə Rusiya hesabat dövründə Azərbaycanın ən çox ixrac əməliyyatı apardığı ölkələr siyahısında 4-cü pillədə qərarlaşıb.

Dövr ərzində Azərbaycandan Rusiyaya ixrac əməliyyatlarının 731,7 milyon dollarlıq hissəsini qeyri-neft məhsulları təşkil eidb ki, bu da ötən ilin ilk 7 ayındakı göstəriciyə nisbətən 15 milyon ABŞ dolları və ya 2,1% çoxdur. Hesabat dövründə Azərbaycanın ümumi qeyri-neft məhsulları ixracında Rusiya 12,33% payla 2-ci mövqeyə sahib olub.

Hesabat dövründə Azərbaycan Rusiyadan 1,360 milyard ABŞ dolları dəyərində idxal əməliyyatları həyata keçirib ki, bu da 2025-ci ilin eyni dövrü ilə müqayisədə 988,3 milyon ABŞ dolları və ya 42,1% azalma deməkdir. Bununla da Rusiya hesabat dövründə Azərbaycanın ən çox idxal əməliyyatı apardığı ölkələr siyahısında 2-ci pillədə qərarlaşıb.

Qeyd edək ki, Azərbaycan və Rusiya rəsmiləri də iki ölkə arasında iqtisadi əməkdaşlığın genişləndirilməsində maraqlı olduqlarını bildirirlər. Moskvada Azərbaycanın xarici işlər naziri Ceyhun Bayramovla keçirdiyi görüşdən sonra Rusiyanın xarici işlər naziri Sergey Lavrov tərəflərin ticarət dövriyyəsinin artırılması, birbaşa investisiyaların genişləndirilməsi və "Şimal-Cənub" beynəlxalq nəqliyyat dəhlizinin qərb qolu üzrə əməkdaşlığı müzakirə etdiklərini bildirib.

"Apreldə hökumətlərarası komissiyanın növbəti iclasının keçirildiyi faktını nəzərə almaqla, ticari-iqtisadi əməkdaşlığı müzakirə etdik. Ticarət dövriyyəsinin gələcəkdə daha da artırılmasına qarşılıqlı marağın mövcud olduğunu qeyd etdik. Ötən il ikitərəfli ticarətin həcmi təxminən 5 milyard dollara çatıb. Rusiya Azərbaycanın əsas iqtisadi tərəfdaşlarından biri olaraq qalır. Ticarət dövriyyəsinin artırılması və birbaşa investisiyaların genişləndirilməsi üçün əhəmiyyətli potensial mövcuddur. Rusiyanın Azərbaycana yatırdığı investisiyaların həcmi təxminən 11 milyard dollar təşkil edir. Respublikada Rusiya kapitallı 1400-dən çox kommersiya qurumu fəaliyyət göstərir", - deyə o bildirib.

Öz növbəsində, Azərbaycanın xarici işlər naziri Ceyhun Bayramov hökumətlərarası komissiyanın müntəzəm fəaliyyətini iqtisadi əməkdaşlığın əsas mexanizmlərindən biri kimi qiymətləndirərək, qlobal iqtisadi çətinliklərə baxmayaraq, Azərbaycan-Rusiya iqtisadi əlaqələrində ümumi dinamikanın müsbət olaraq qaldığını vurğulayıb.

"Əminəm ki, bu gün ticarət-iqtisadi əməkdaşlıq blokunu da ətraflı müzakirə edə biləcəyik. Bu istiqamətin mühüm elementlərindən biri Azərbaycan ilə Rusiya Federasiyası arasında hökumətlərarası komissiyanın müntəzəm təmaslarıdır. Komissiyanın 24-cü iclası bu ilin aprel ayında keçirilib. Bu kontekstdə hesab edirik ki, bütövlükdə dünya iqtisadiyyatında mövcud olan bütün çətinliklərə baxmayaraq, ölkələrimiz arasındakı trend müsbətdir. Bu gün, yəqin ki, 2025-ci ilin rəqəmləri və göstəriciləri, eləcə də yaxın perspektiv üçün müəyyən edilmiş istiqamətlər üzərində daha ətraflı dayanacağıq", - deyə o bildirib.

Müəllif: Malik Məlikov (Milli.Az redaktor)