Azərbaycan neftinin qiyməti 98 dolları keçdi

"Azeri Light" markalı Azərbaycan nefti dünya bazarında bahalaşıb.

Milli.Az xəbər verir ki, İtaliyanın Auqusta limanında CIF bazasında "Azeri Light" markalı neftin bir barelinin qiyməti əvvəlki göstərici ilə müqayisədə 0,39 ABŞ dolları (0,4 faiz) artaraq 98,58 ABŞ dollarına yüksəlib.

Türkiyənin Ceyhan limanında FOB bazasında Azərbaycan neftinin bir bareli isə 0,74 ABŞ dolları (0,79 faiz) bahalaşaraq 94,86 ABŞ dolları olub.

Digər etalon neft markalarında da artım qeydə alınıb. Belə ki, "Urals" markalı xam neftin bir bareli 1,51 ABŞ dolları (2,5 faiz) bahalaşaraq 61,99 ABŞ dollarına, "Dated Brent" markalı neft isə 0,96 ABŞ dolları (1,05 faiz) artaraq 92,16 ABŞ dollarına çatıb.

Qeyd edək ki, Azərbaycanın 2026-cı il dövlət büdcəsində neftin bir barelinin orta qiyməti 65 ABŞ dolları səviyyəsində nəzərdə tutulub.

"Trading Economics"in məlumatına görə, ABŞ və İran arasında yenidən gərginləşən qarşıdurma enerji bazarında riskləri artırmaqda davam edir. Baxmayaraq ki, cümə günü xam neftin qiyməti 82 ABŞ dollarına doğru geriləyib, geosiyasi risklərin təsiri ilə qiymətlər ay ərzində təxminən 20 faiz yüksəlib.

Məlumata əsasən, ABŞ ordusunun İran hədəflərinə endirdiyi yeni zərbələr regionda diplomatik həll perspektivlərini zəiflədərək enerji tədarükü ilə bağlı narahatlıqları artırıb.

Bununla yanaşı, son günlərdə azalan gərginlik fonunda Hörmüz boğazı vasitəsilə tanker daşımalarının həcmi yenidən artıb və milyonlarla barel xam neftin daşınması bərpa olunub.

Eyni zamanda, Səudiyyə Ərəbistanı Qırmızı dənizdə gəmiçiliyin təhlükəsizliyini təmin etmək məqsədilə 43 ölkənin iştirakı ilə dəniz koalisiyasının yaradılması istiqamətində danışıqlar aparır. Bu addım İranın dəstəklədiyi husi qruplaşmasının tətbiq etdiyi blokadadan sonra atılıb.

Analitiklərin fikrincə, bazar iştirakçıları Qara dəniz regionunda da vəziyyəti diqqətlə izləyirlər. Belə ki, neft tankerlərinə son hücumlardan sonra Qazaxıstan neftinin ixracı üçün strateji əhəmiyyət daşıyan terminalda yükləmələrin yenidən dayandırılması tədarükdə mümkün fasilələrlə bağlı narahatlıqları artırır.

Müəllif: Malik Məlikov (Milli.Az redaktor)