Mədəniyyət

Azərbaycanda ilk müziklin premyerası anşlaqla keçdi - FOTO

16 Aprel 2018 14:59
Baxış: 573

Aprelin 15-də Heydər Əliyev sarayında "Ələddin" adlı ilk uşaq müziklinin premyerası anşlaqla keçdi

Azərbaycan Televiziyasının Mədəniyyət kanalı ilə Heydər Əliyev sarayının birgə layihəsi olan bu layihə Mədəniyyət və Turizm Nazirliyin dəstəyi ilə həyata keçdi.

Uğurun səbəblərindən biri - uşaqdan böyüyə qədər hər kəsin yaxşı tanıdığı "Ələddin və sehrli çıraq" nağılına tam fərqli, dəyişik bir yanaşmadır. Milli alətlərlə aranjiman olunmuş bənzərsiz musiqi, incə yumor, şən rəqslər, zəngin dekorasiyalar, ən əsası isə, aktyorların məharətli oyunu səhnədə tam başqa bir aləm yaratdı, tamaşaçıları sehrli nağılın gerçək olduğuna inandırdı.

Uğurun digər səbəbi- müzikldə ən çox sevilən estrada ulduzları və populyar aktyorların iştirakıdır. Ələddin rolunda Zamiq Hüseynov, Yasəmən rolunda Emiliya Yaqubova (birinci seansda)  və Sevda Yahyayeva (ikinci seansda), digər rollarda - Azərbaycan Respublikasının Əməkdar artisti Ələkbər Əliyev, Hüseyn Abdullayev, Nicat Cəfərzadə, Hüseyn Əlili və Tofiq Hacıyev tamaşaçıların ürəklərini fəth edən unudulmaz obrazlar yaratdılar.

Qeyd edək ki, müziklın quruluşçu-rejissoru - Azərbaycan Respublikasının Əməkdar artisti İnarə Babayeva, rəssamı Fərid Nəcəfli, musiqi redaktoru Emin Həsənov, redaktoru Leyla Qədirzadə, xormeysteri Şəhla Ələkbərova, baletmeysterləri Vahid Səlimov və Rasita Əliyevadır.

Xüsusi qeyd etmək lazımdır ki, tamaşaya müxtəlif müəssisə və təşkilatlardan, o cümlədən "İnayət" Əlillərə Yardım Assosiasiyası, "Ümid işığı", "Beynəlxalq Əlillər cəmiyyəti, Yasamal rayonu Əlillər cəmiyyəti, 11 saylı xüsusi təhsil mərkəzi və s. mərkəzlərdən 1200 nəfər kimsəsiz və əlil uşaq dəvət olunmuş, müzikli maraqla izləmişdilər.

Şübhəsiz ki, ilk müzikl bu sahədə yeni layihələrə yol açacaq.                    

İnformasiya dəstəyi- Trend.az, Day.az, Milli.az

Milli.Az

Məqaləyə dair fotomateriallar:

loading...

XƏBƏR LENTİ

Copyright © 2015 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.