Qəbələ III Beynəlxalq Musiqi Festivalında kamera musiqisi və "Viva opera" konserti olub

Heydər Əliyev Fondunun təşkil etdiyi Qəbələ III Beynəlxalq Musiqi Festivalı çərçivəsində kamera musiqisi və "Viva opera" konserti olub. AzərTAc xəbər verir ki, iyulun 25-də "Qafqaz Resorte" otelində keçirilən kamera musiqisi konsertində bəstəkar V.Motsartın və Y.Bramsın iki piano üçün sonatası, M.Ravelin valsı, F.Şopenin rondosu, A.Məlikovun skertsosu, Q.Qarayevin "Gözəllər gözəli" ("Yeddi gözəl" baletindən) səsləndirilmişdir.

İkinci hissədə Üzeyir Hacıbəyli adına Azərbaycan Dövlət Simfonik Orkestrinin "Viva opera" konserti olub. Konsertdə bəstəkar C.Verdinin "Taleyin gücü" operasından uvertura və Leonoranın melodiyası, J.Bizenin "Karmen" operasından Siqidiliya, V.Bellinin "Norma" operasından Normanın ariyası, L.Delibin "Lakme" operasından Lakmenin əfsanəsi, N.Rimski-Korsakovun "Çar gəlini" operasından Qryaznoyun ariyası, Lyubaşa və Qryaznoyun dueti, F.Əmirovun "Sevil" operasından Balaşın ariyası, P.Maskanyinin "Kənd namusu" operasından Ave Mariya, F.Çileanın "Adriyenna Lekuvrer" operasından Adriyennanın ariyası, C.Puççininin "Manon Lesko" operasından "İntermezzo", "Madam Batterflay" operasından Çio-Çio-Sanın ariyası, "Turandot" operasından Kalafın ariyası, P.Leonkavallonun "Payatsı" operasından Silvio və Neddanın dueti səsləndirilmişdir.

Konsertlərdə pianoçular-Ü.Hacıbəyli adına Bakı Musiqi Akademiyasının dosenti, Əməkdar Artist Kəmalə Neymanova, Əməkdar Artist Nərgiz Əliyarova, Əməkdar Artist, Prezident təqaüdçüsü Gülnaz İsmayılova, Azərbaycan Dövlət Opera və Balet Teatrının solistləri Fəridə Məmmədova və Səbinə Əsədova, Azərbaycan Dövlət Musiqili Komediya Teatrının solisti Ülviyyə Novruzova, Əməkdar Artist, Prezident təqaüdçüsü Əvəz Abdullayev, Azərbaycan Dövlət Simfonik Orkestrinin dirijoru, Xalq Artisti Azad Əliyev, beynəlxalq mükafatlar laureatı Yusif Eyvazov çıxış etmişlər.

Milli.Az