"Eurovision-2012" mahnı müsabiqəsinin keçiriləcəyi "Baku Crystall Hall"ın tikintisi yekunlaşmaq üzrədir

AzərTAc xəbər verir ki, "Eurovision-2012" mahnı müsabiqəsinin keçiriləcəyi "Baku Crystall Hall"ın tikintisi yekunlaşmaq üzrədir. "Baku Crystall Hall" tikintisinə 2011-ci ilin avqustunda başlanılmışdır. Tikinti işlərini Almaniyanın "Alpine Bau Deutchland AG" şirkəti həyata keçirir.

Layihə direktoru Qünter Şigan bildirmişdir ki, bu ilin əvvəlindən başlanan qeyri-sabit hava şəraiti onları əlavə tədbirlər görməyə vadar etmişdir. Nəticədə tikinti işləri cədvələ uyğun aparılmışdır. Hazırda sarayın fasadı və dam örtüyündə işlər davam etdirilir. Zalda havalandırma sistemi quraşdırılmış, elektrik naqilləri çəkilmişdir. İşlərin sistemli görülməsi nəticəsində sarayın xüsusi layihə üzrə hazırlanan tavanı artıq qurulmuş və zəruri elementlərlə təmin olunmuşdur. Artıq zalın üzərindəki kristalların da quraşdırılmasına başlanılmışdır.

Direktor demişdir: "İlin əvvəlindən başlayan pis hava şəraiti vaxt itkisinə səbəb ola bilərdi. Lakin təşkilatı işlər yüksək səviyyədə qurulduğundan bu fəaliyyətimizdə heç bir problem yaratmadı. Sarayın vaxtında istifadəyə verilməsi üçün tikintiyə 1400 işçi qüvvəsi cəlb edilmişdir. Tikinti işləri martın sonlarında yekunlaşacaq və aprelin ortalarınadək müsabiqənin səhnəsi və işıq sistemləri quraşdırılacaqdır".

Vurğulanmışdır ki, sarayın yaxınlığında müsabiqədə qeydiyyatdan keçmiş jurnalistlər üçün xüsusi mətbuat mərkəzi inşa olunur. Mətbuat mərkəzində də tikinti işləri sürətlə davam etdirilir. Hazırda arenanın ətrafında da tikinti-abadlıq işləri aparılır.

Cari ilin yanvarında arenada olan Avropa Yayımları Birliyinin nümayəndələri burada aparılan tikinti işləri ilə yaxından tanış olmuş və görülmüş işləri yüksək qiymətləndirmişlər.

"Baku Crystall Hall"da təşkil ediləcək "Eurovision-2012" mahnı müsabiqəsinin yarımfinalları mayın 22-si və 24-də baş tutacaqdır. Birinci yarımfinalda 18, ikinci yarımfinalda isə 19 ölkə mübarizə aparacaqdır. Müsabiqənin final mərhələsi mayın 26-da keçiriləcəkdir.

"Baku Crystall Hall"da dünya və Avropa idman yarışlarının keçirilməsi də mümkün olacaqdır.

Milli.Az