Bakıda film kimi cinayət: Söyüşə görə “Mercedes”lə “Porshe”ni məhv etdi

Bakıda baş verən ağır yol nəqliyyat hadisəsinin qəsdən törədildiyi məlum olub. Hər iki maşında olan şəxslər tanış olublar. Qəzanı törədən şəxs içkili imiş.

Milli.Az "musavat.com"a istinadən xəbər verir ki, Dilsuz və Araz adlı şəxslər dost olublar. Onlar arasındakı münasibətlər uzun illər davam edib. Araz xarici ölkələrdən avtomobil gətirərək satırmış. Dilsuz isə Bakıda "Labirint" çay evini işlədirmiş. Dilsuz əlavə pul qazanmaq üçün Arazın xaricdən maşın gətirmək təklifi ilə razılaşıb.

Bu məqsədlə Dilsuza 12 min dollar pul verib. Bu pula "Mercedes Benz GL450" markalı maşın alınacaqdı.

Dilsuz həmin maşını Bakıda sataraq 6-7 min manat pul qazanmağı düşünüb. Əvvəlcə maşın hərracda alınıb və Araz bu barədə Dilsuza məlumat verib. Lakin 3 gün sonra Dilsuz avtomobilin yenidən hərraca çıxarıldığını və gürcüstanlı bir şəxs tərəfindən alındığını görüb. Bu barədə Araza məlumat verib. Araz isə həmin gürcüstanlı şəxsin öz adamı olduğunu və maşının artıq Poti şəhərinə gətirildiyini deyib.

Maşının Potiyə çatmalı olduğu vaxt bitəndən sonra Araz müxtəlif bəhanələr gətirərək maşını çatdırmayıb və bildirib ki, karqo şirkətində problem var. Həmin ərəfədə Araz şəxsi ehtiyacı üçün Dilsuzdan əlavə 6 min dollar da borc alıb.

Bir müddət keçəndən sonra Araz nə maşını çatdırıb, nə də aldığı borcu qaytarıb. Buna görə onlar arasında mübahisələr başlayıb.

Araz Dilsuzun zənglərinə cavab vermədiyi üçün mübahisələr böyüyüb. Sonuncu dəfə Dilsuz Araza zəng edərək görüşmək istədiyini deyib. Həmin vaxt Araz tanışları ilə məclisdə olub. İçkili olan Araz Dilsuzun ünvanına ağır söyüşlər söyüb. Dilsuz isə görüşmək üçün Arazdan ona məkanı söyləməsini istəyib. Araz buna daha da əsəbləşib və Dilsuzu təhqir edib, onun qarnını deşəcəyini, maşınla üstündən keçəcəyini deyib. Bu söyüşləri məclisdə olan dostlarının yanında işlədən Araz Dilsuzun gəlməsini gözləyib.

Dilsuz Arazın olduğu məkana çatanda orada 6-7 nəfər şəxsin olduğunu görüb. Arazla eyni məclisdə olan Anar adlı şəxs Dilsuzu kənara çəkərək onunla söhbət edib.

Anar adlı şəxs Arazın içkili olduğunu deyərək Dilsuzdan onu yola verməsini xahiş edib. Uzun söhbətdən sonra Anar adlı şəxs Dilsuzu razı salıb. Dilsuz söhbəti Araz içkinin təsirindən ayıldıqdan sonra etməyə razılaşaraq oradan uzaqlaşıb. Həmin ərəfədə Dilsuzun dostlarından biri də onun yanına gəlib və birlikdə evə doğru hərəkət ediblər.

Babək prospektində olan zaman Araz Dilsuza zəng edərək harada olduğunu soruşub və gözləməsini istəyib. Dilsuz isə sabah söhbət edə biləcəklərini deyib. Lakin Araz sakitləşməyib və dostlarının yanında söydüyü söyüşü "yeməyəcəyini" deyərək onunla görüşə tələsib. Araz Babək prospektində işıqforda Dilsuza çata bilib. Araz idarə etdiyi "Mercedes" markalı avtomobillə Dilsuzun içərisində olduğu "Porsche Cayenne GTS Coupe" markalı maşını arxadan vurub.

Qəza zamanı 250 min dəyəri olan avtomobilin 80 faizi yarasız vəziyyətə düşüb və Dilsuza 200 min manat ziyan dəyib. Həmçinin işıqfor da yararsız hala düşdüyü üçün Daxili İşlər Nazirliyinə 5 min manat dəyərində ziyan dəyib. 

Qəza zamanı Dilsuzun özü və avtomobildə olan dostu xəsarətlər alıblar. Bu əməllərinə görə Araza dələduzluq, qəsdən sağlamlığa zərər vurma və qəsdən özgə əmlakını məhv etmə maddələri ilə ittiham irəli sürülüb.

Məhkəmə istintaqı dövründə tərəflər arasında barışıq olub. Dilsuz ona dəymiş 220 min manatlıq zərərin ödənildiyini, barışıdıqlarını deyib.

Həbsdə olan Araz barəsində 3 il 9 ay müddətinə azadlıqdan məhrum etmə cəzası təyin edilib. Məhkəmə zərərçəkmişlərlə barışıq əldə olunmasını, dəymiş zərərin ödənilməsini nəzərə alaraq Arazın cəzasını şərti hesab edərək məhkəmə zalından azadlığa buraxıb.

Məhkəmə hökmdə qeyd edib ki, Daxili İşlər Nazirliyi də dəymiş zərərin ödənilməsi üçün mülki iddia verə bilər.

Milli.Az