Ölkə

"Həkimə gecikənlər reanimasiyaya gedir, oradan da qayıtmır" - İnfeksionist

20 Noyabr 2020 14:14
Baxış: 4 033

Sərtləşdirilmiş karantin rejimi lazım idi.

Bunu Milli.Az-a açıqlamasında həkim-infeksionist İlhamə Abbasova deyib.

İnfeksionist bildirib ki, Nazirlər Kabinetinin xüsusi karantin rejimini sərtləşdirməsi ilə bağlı qərarı düzgün addımdır:

"Xəstə bilirsiniz nə qədərdir?! Hamısı da ağır-ağır. Öhdəsindən gəlmək olmur. Oturub evdə müalicə alırlar, ağırlaşıb gəlirlər. Deyirlər koronavirus mutasiya oldu, amma virus eynilə ilk gündəki kimidir. COVİD-in eyni gedişatıdır. Vaxtilə həkimə müraciət edənin səhhəti stabil olur evinə qayıdır, həkimə gecikmiş gələn isə reanimasiyaya gedir, oradan da artıq qayıtmır. Yəni, bu, artıq qaydadır.

Maskada olsalar, yoluxmanın qarşısı alınar

Nazirlər Kabinetinin xüsusi karantin rejimini sərtləşdirməsi ilə bağlı qərarı düzgün addımdır. Bu qaydalar yaxşıdır, yenə heç olmasa yoluxmanın bir az da olsa, qarşısı alınar. Açıq havada ona görə maskadan istifadənin məcburi olması yaxşı oldu ki, ara məsafəsi saxlamadan yığırlar dayanacaqlarda avtobus gözləyirlər, özü də maskasız. Açıq havada olmağına baxmayaraq bir-birlərinə yaxın dayanırlar. Maskada olsalar, yoluxmanın qarşısı alınar.

Şənbə-bazar günləri də insanlar boş olan kimi harasa mağazaları gəzməyə, restorana, kafeyə gedirdilər. O səbəbdən həftəsonları artıq müəyyən edilmiş tarixə qədər həyati əhəmiyyət kəsb edən fəaliyyət növləri, o cümlədən aptek və ərzaq mağazaları istisna olmaqla digər bütün sahələr üzrə yerində xidmətlərin dayandırılması daha yaxşı oldu. Düzdür, mağazalarda maska verilir, ancaq ki toplum şəkildə çoxluğun qarşısını yenə almaq mümükün olmur. Böyük ərzaq mağazalarında kassaların qarşısında insanlar sosial məsafəyə riayət etmirlər.

Karantin rejimini sərləşdirilməkdə hələ gecikiblər

Bu qaydalar olmalı idi, gecikiblər hələ. Sərtləşdirilmiş bu karantin rejimini, ümumiyyətlə, müddətsiz olaraq tətbiq etməlidirlər, COVİD bitənə qədər belə olmalıdır. Çünki biz belə edirik, bir balaca yoluxmanın qarşısı alınır, sonra karantin yumşaldılır, yenə yoluxma sayı artır. İnsanlar da bilmirəm, beziblərmi, yoxsa psixologiyalarımı pozulub, əhəmiyyət vermirlər. Artıq bir ili tamam oldu bu virusun, amma yenə də insanların çoxu bu virusun varlığına inanmırlar, əhəmiyyət vermirlər, qorunmurlar".

Təhməz Əsədov
Milli.Az  

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.