"Xoşqədəmin verilişi bağlanandan sonra..." - YENİLƏNİB

13:00

Xoşqədəm Hidayətqızının verilişi bağlanandan sonra "qaynar xətt"ə təşəkkür zənglərinin ardı-arası kəsilmir.   Bu sözləri Milli Televiziya və Radio Şurasının (MTRŞ) aparat rəhbəri Toğrul Məmmədov Mir Şahin Ağayevin MTRŞ ilə bağlı irəli sürdüyü ittihamlarla bağlı Axar.az-a danışarkən deyib:  

"MTRŞ-nin heç kimlə bir problemi yoxdur. Məhkəməyə müraciət etmək hər kəsin konstitusion hüququdur. Kiminsə bir narazılığı varsa, məhkəməyə müraciət edə bilər. MTRŞ "Sən tək deyilsən!" və "Xoşqədəmlə axtarıram səni" verilişlərinin bağlanması ilə bağlı qərar verdikdən sonra "qaynar xətt"ə gələn təşəkkür zənglərinin ardı-arası kəsilmir".  

Toğrul Məmmədov eyni formatlı verilişlərin digər kanallarda hələ də yayımlanması ilə bağlı irəli sürülən iddialara da münasibət bildirib:   "Eyni formatda, şou xarakterli, milli-mənəvi dəyərlərimizə zidd olan bütün verilişlər bağlanacaq. Əgər hansısa telekanal bunu bizdən öncə edib, bu xarakterli verilişləri bağlayırsa, bu, artıq təqdirəlayiqdir. Bu addımı Şura dəyərləndirir və hər hansı ciddi addıma ehtiyac duymur. ANS özü verilişlərini dayandırsaydı, belə addım atılmazdı. Qanun pozuntusu davamlı xarakter alanda sanksiyalar tərtib olunur".  

Xatırladaq ki, MTRŞ-nın "Sən tək deyilsən!" və "Xoşqədəmlə axtarıram səni" verilişlərini bağlamaq qərarından sonra ANS Müstəqil Yayım və Media Şirkətinin baş direktoru Mir Şahin Ağayev  Şuranı məhkəməyə verəcəklərini açıqlamış və Nuşirəvan Məhərrəmlinin Xoşqədəm Hidayətqızı ilə problemini olduğunu iddia etmişdi.

---------

12:46

Milli Televiziya və Radio  Şurasının (MTRŞ) sentyabrın 30-da keçirilən iclasında ANS televiziyasının efirində yayımlanan "Sən tək deyilsən", "Xoşqədəmlə axtarıram səni" proqramlarında sosial problemlərin həllinə dəstək adı altında yaradılan saxta şouların mövcudluğu, ailədaxili münaqişələr, cəmiyyətdə müşahidə olunan digər bu kimi ayrı-ayrı neqativ halların müzakirə mövzusuna çevrildiyi nəzərə alınaraq, bu verilişlərin yayımının 1 ay müddətinə dayandırılması qərara alınıb. Bu qərardan narazı qalan ANS TV-nin baş direktoru Mirşahin Ağayev Teleradio Şurasını məhkəməyə verəcəyini açıqlayıb. Mirşahin Ağayev MTRŞ sədri Nuşirəvan Məhərrəmlini "Onun Xoşqədəm problemi var" deyə ittiham edib.

MTRŞ-nin bu açıqlamaya cavabı gecikməyib. Şuranın  aparat rəhbəri Toğrul Məmmədov modern.az saytına bildirib ki, hər bir Azərbaycan vətəndaşının məhkəməyə müraciət etmək hüququ var:

"ANS-in yarıtmaz fəaliyyətinin nəticəsidir ki, proqram siyasətində əhalinin çoxsaylı narazılığına səbəb olan bayağı verilişlər yayımlanır. Uzun müddətdir ki, əhalinin müxtəlif təbəqəsi verilişlərlə bağlı narazılıqlarını şuraya bildirirdi. Şou xarakterli, bayağı, milli-mənəvi dəyərlərə uyğun olmayan verilişlərin yayımı "Televiziya və radio yayımı" haqqında qanunun tələblərinin pozulması kimi qiymətləndirilir. Qanunun 32-ci maddəsinə əsasən, proqram yayımına bir sıra tələblər verilib. Maddədə milli-mənəvi dəyərlərə ardıcıl şəkildə əməl olunması, şəxslərin hüquq və azadlıqlarının qorunması və s. kimi tələblər var. Qeyd edim ki, bu tip verilişlərin dayandırılması bundan sonra da davam etdiriləcək".

Toğrul Məmmədov Mirşahin Ağayevin  "verilişin dayandırılması Xoşqədəm Hidayəqızına qarşı atılmış addımdır" fikrinə cavab olaraq deyib ki, bu, onun şəxsi mülahizəsidir:

"Hər bir insan istədiyi fikri söyləməkdə sərbəstdir. Burada söhbət əhalinin müxtəlif təbəqələrinin yekdil fikrindən, bu cür verilişlərdən narazılığından gedir. Milli Televiziya və Radio Şurası da əsasnaməyə uyğun olaraq dövlətin və cəmiyyətin mənafeyinə xidmət edir".

MTRŞ-nın qərarında göstərilir ki, "Sən tək deyilsən" və "Xoşqədəmlə axtarıram səni" verilişlərinin fəaliyyəti 1 ay müddətinə dayandırılır. Belədə hər iki veriliş 1 aydan sonra fəaliyyətini bərpa edə bilər?..

T.Məmmədov suala belə cavab verib:

""Televiziya və radio yayımı" haqqında qanunun 23.1 maddəsinə əsasən, şuraya həm proqramın, həm də xüsusi lisenziyanın qüvvəsinin 1 ay müddətinə dayandırılması səlahiyyəti verilib. Şura bu səlahiyyətdən istifadə edərək belə bir qərar çıxarıb. Qərarda da göstərilib ki, həmin proqramların efir vaxtında mədəni, maarifçilik, intellektual xarakterli proqramların yayımı ANS telekanalı tərəfindən təmin edilməlidir. Əgər bu qərardan sonra bu cür hallar davam edəcəksə, əlbəttə, cəza tədbirləri olacaq".

Qurum rəsmisi şuranın verilişin bağlanmasında səlahiyyətli olmadığı iddiasını da cavablandırıb:

"Qanunvericiliyin tələblərindən xəbəri olmayan insanlar deyə bilərlər ki, şuranın verilişin yayımını dayandırmaq hüququ yoxdur. 2015-ci ilin fevral ayında "Televiziya və radio yayımı" haqqında qanuna edilmiş dəyişikliyə əsasən, bu səlahiyyət şuraya verilib. Sentyabr ayında da prezident İlham Əliyev tərəfindən təsdiq edilmiş "Milli Televiziya və Radio Şurası" haqqında əsasnamənin 8.11-1-ci bəndinə əsasən, qanunvericiliyin tələbləri və lisenziyanın şərtləri pozulduğu təqdirdə şura lisenziyanı 1 ay müddətinə ləğv etmək, həm də proqramı 1 ay müddətinə dayandırmaq ixtiyarındadır".

Milli.Az