Ölkə

Bayrama görə otellərin qiyməti bahalaşdı - 2000 manata qədər yüksəldi

12 Mart 2026 11:08

Baxış: 1 499

VTB-də minimal faiz dərəcəsi ilə nağd kredit 9.9%-dən

#OTEL #NOVRUZ

Novruz bayramı ərəfəsində Azərbaycanda hotellərdə qiymətlər artıb, xüsusilə bölgələrdə yerləşən məşhur istirahət mərkəzlərində bayram paketlərinin qiyməti 2000 manata qədər yüksəlib.

Milli.Az bayram günlərində bəzi hotellərin qiymətlərini araşdırıb.

Novruz bayramı ilə əlaqədar uzunmüddətli istirahət günlərinin olması daxili turizmə tələbatı artırıb. Bu səbəbdən Qəbələ, Quba, Şahdağ və Naftalan istiqamətində yerləşən hotellərdə yerlərin böyük hissəsi əvvəlcədən bron edilib.

Məlumata görə, Qafqaz Riverside Hotel, Qafqaz Tufandag Mountain Resort Hotel və Chenot Palace Health Wellness Hotel kimi hotellərdə 3 gecəlik bayram paketlərinin qiyməti təxminən 900-1500 AZN arasında dəyişir. Paketlərə səhər yeməyi, şam yeməyi, bayram proqramları və SPA xidmətləri daxildir.

Qusar istiqamətində yerləşən Shahdag Hotel & Spa və Pik Palace Shahdag hotellərində isə qiymətlər daha yüksəkdir. Bayram günləri üçün 3 gecəlik paketlərin qiyməti otaq növündən asılı olaraq 1200-2000 AZN-ə qədər yüksələ bilər.

Naftalan şəhərində fəaliyyət göstərən Garabag Resort & Spa və Chinar Hotel & Spa Naftalan hotellərində də Novruz proqramları təşkil olunur. Bu hotellərdə bayram paketləri orta hesabla 700-1300 AZN civarındadır.

Novruz dövrü turizm sektoru üçün ilin ən aktiv mövsümlərindən biri hesab olunur və bayram günlərində hotellərdə qiymətlər adi günlərlə müqayisədə daha yüksək olur. Qeyd edilir ki, yerlərin məhdud olması səbəbindən qiymətlərin son günlərdə daha da artması mümkündür.

Ayxan
Milli.Az