Avto

Bu maşınlar bahalaşacaq – 3-4 min manat fərq olacaq

19 Sentyabr 2025 09:52
Baxış: 7 620
VTB-də minimal faiz dərəcəsi ilə nağd kredit 9.9%-dən
#CƏMİYYƏT #İQTİSADİYYAT #AVTO #AVTOMOBİL #MAŞIN BAZARI

Hazırda avtomobil bazarında maşın satmaq istəyənlər üçün acınacaqlı, almaq üçün isə əlverişli şərait yaranıb.

Milli.Az-ın məlumatına görə yeni hibrid maşınlar üçün tətbiq olunan güzəştlər ikinci əl maşınların bazarını xeyli "öldürüb". 18-30 min arası qiymətə yeni Çin avtomobillərinin təklif edilməsi ənənəvi markalara ( Mercedes, BMW, Toyota, Hyundai, Kia və s. ) marağı kəskin azaldıb.

Bakıda insanların günün 4,5 saatını tıxacda keçirdiyini nəzərə alsaq benzin mühərrikli maşınlar lap arxa plana keçib. Demək olar ki, benzinlə işləyən maşınları alan yoxdur. Bu səbəbdən də bu maşınların qiymətində 5-6 min manata yaxın ucuzlaşma hiss olunur.

Lakin, hibrid avtomobillər üçün tətbiq olunan güzəştlər bu ilin sonuna kimi nəzərdə tutulub. Güzəşt müddətinin uzadılması gözlənilsə də, uzadılmamaq ehtimalı da var. Güzəşt müddəti uzadılarsa avtomobil parkı tam yenilənəcək, ili köhnə maşınlar isə "su qiymətinə" düşəcək. Yox əgər, güzəşt müddəti uzadılmasa onda həm Çin maşınları, həm də digər ikinci əl maşınlar kəskin bahalaşacaq. Ekspertlər düşünür ki, hibrid maşınlar üçün güzəşt müddəti uzadılmasa ikinci əl maşınların qiyməti 3-5 min manat artacaq.

Məlum məsələdir ki, müştərilər Çin maşınlarını ucuz olduğuna görə alırdılar. Çin maşınlarının qiyməti gömrük rüsumuna görə artsa, ənənəvi markaların bazarı xeyli canlanacaq. Bu səbəbdən də ikinci əl maşın satan şəxslərə səbr etmələri, ikinci əl maşın almaq istəyənlərə isə mövcud ucuzlaşmanı dəyərləndirmək tövsiyyə olunur.

Qeyd edək ki, Dövlət Gömrük Komitəsinin məlumatına əsasən, bu ilin ilk 8 ayında Azərbaycana 733 milyon dollar dəyərində 37 183 ədəd hibrid mühərrikli avtomobil idxal edilib. Bu isə ötən illə müqayisədə 2.7 dəfə artım deməkdir.

İslam
Milli.Az

Milli.Az - Xəbər Portalı
Azernews Newspaper

DİGƏR XƏBƏRLƏR

XƏBƏR LENTİ

Copyright © 2026 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.