"Cruze"un xroniki problemləri - Niyə "tefal" deyilir?

Bakıda 9-12 min manat arası məbləğə təklif olunan "Chevrolet Cruze" modelləri üstün texnologiyasına görə çoxları tərəfindən sevilir. Həmin məbləğə bu qədər çox müasir texnologiyaya sahib digər avtomobilin az olması onun daha çox alınmasına səbəb olur.

Bəs sosial şəbəkələrdə "tefal" ( mühərrik qızma probleminə görə belə adlandırılır - red ) adlandırılan Chevrolet Cruze almağa dəyər?

Milli.Az xəbər verir ki, 2008-2016-cı illər arasında istehsal olunan Cruze modellərində daha çox rast gəlinən problemlər bunlardır:

Mühərrik və soyutma sistemi problemləri - 1.4 litrlik turbo mühərrikdə yağ sızması, termostat və su nasosunun nasazlığı tez-tez müşahidə edilir. Mühərrikin həddindən artıq qızması və soyutma mayesinin sızması əsas problemlərdən biridir.

Sürətlər qutusu nasazlıqları - Xüsusilə 6 pilləli avtomatik transmissiyada sərt keçidlər, titrəmələr və ötürmələrin düzgün dəyişməməsi kimi problemlər baş verir.

Elektrik sistemində nasazlıqlar - Akumulyatorun tez boşalması, sensorların düzgün işləməməsi, xüsusilə də "Check Engine" işığının səbəbsiz yanması kimi hallar olur.

Turbin və qızdırıcı sistemində problemlər - Turbo mühərriklərdə turbinin vaxtından əvvəl sıradan çıxması və salonun qızdırıcı sistemində antifriz axıntıları tez-tez müşahidə edilir.

Asqı və sükan sistemi problemləri - Ön asqıda vaxtından əvvəl yeyilmə, sükan mexanizmində boşluq və səs-küy kimi nasazlıqlar yaranır.

Korroziya və kuzov problemləri - Bəzi Cruze modellərində, xüsusilə qış aylarında yollara səpilən duzlu qarışıqlara qarşı dayanıqlılığı zəif olan kuzov hissələrində paslanma müşahidə olunur.

Bu problemlər Chevrolet Cruze sahibləri tərəfindən ən çox bildirilən ümumi nasazlıqlardır. Daimi texniki baxım və vaxtında ehtiyat hissələrinin dəyişdirilməsi bu nasazlıqların qarşısını almağa kömək edə bilər.

İsmayıl
Milli.Az