Siyasət

Cəbhədə son vəziyyət - VİDEO

2 Aprel 2016 15:05
Baxış: 24 520

Cəbhədə ermənilərin təxribatı davam edir. Bütün cəbhəboyu mövqelərimiz iriçaplı silahlar, minaatanlar, qumbaraatan və artilleriya qurğularından intensiv atəşə tutulub. Qarşı tərəfin hərbi aktivliyini genişləndirməyə imkan verməmək, onun fəaliyyətinin qarşısını almaq məqsədilə dərhal cavab tədbirləri görülüb. Cəbhənin ən gərgin Ağdərə-Tərtər-Ağdam və Xocavənd-Füzuli istiqamətində yerləşən birliklər, artilleriya bölmələri və digər qoşun növlərinin birgə, əlaqəli fəaliyyəti nəticəsində qısa müddətdə Ermənistan silahlı bölmələrinə qarşı cavab tədbirləri həyata keçirilib. Düşmən müdafiəsinin ön xəttində və dərinliyində cəmləşən hərbi hədəflərin koordinatları əvvəlcədən müəyyənləşdirilib, atəş gücü vasitəsilə edilən həmlələrimiz nəticəsində onun döyüş texnikası, xeyli sayda canlı qüvvəsi və digər hərbi infrastrukturu sıradan çıxarılıb.

Milli.Az TTV-yə (Region TV) istnadən xəbər verir ki, Ermənistan silahlı qüvvələri qoşunların təmas xəttinə yaxın mülki əhalinin kompakt yaşadığı bir sıra yaşayış məntəqələrini də atəşə tutub. Tərtərin Qapanlı kəndi istiqamətinə atılan mərmilərdən biri minik avtomobilinin yanında partlayıb. Nəticədə Qarağacı kəndində məskunlaşan Ağdam rayonundan məcburi köçkün, Cəlal Rəhimov dünyasını dəyişib. Onun qardaşı oğlu Orxan Rəhimov isə ayaqlarını itirib. Ağdam istiqamətinə atılan mərmilər də dinc sakinlərin yaşadığı qəsəbəyə düşüb.

Müdafiə Nazirliyi Ermənistanın bəzi kütləvi informasiya vasitələrində guya Azərbaycan Hərbi Hava Qüvvələrinə məxsus helikopterin vurulması barədə yayılan məlumatlara münasibət bildirib. Nazirlikdən bildirilib ki, bu xəbər kökündən yalandır, təxribat xarakterlidir və dezinformasiya məqsədi daşıyır. Kütləvi informasiya vasitələri nümayəndələrini rəsmi olmayan, dəqiqləşdirilməmiş və qeyri-obyektiv məlumatlardan istifadə etməməyə çağırıb. Ümumiyyətlə sutka ərzində atəşkəs rejimini 127  dəfə pozub. Azərbaycan ordusu əməliyyat şəraitini nəzərə alaraq düşmənin atəş nöqtələrinə, mövqelərinə və səngərlərinə  130 dəfə atəş zərbəsi endirib.                  

Milli.Az

Videonu izləmək üçün şəklə klikləyin:

Cəbhədə son vəziyyət

 

Azernews Newspaper

XƏBƏR LENTİ

Copyright © 2025 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.