Dünya

Rusiyadakı təyyarə qəzasında ölən azərbaycanlının kimliyi dəqiqləşdirilib - Azərbaycan XİN

12 Fevral 2018 11:01

2 Şərh Baxış: 3 754

#RUSİYA #QƏZA #TƏYYARƏ #AZƏRBAYCAN

Xarici İşlər Nazirliyi, Fövqəladə Hallar Nazirliyi və Daxili İşlər Nazirliyi tərəfindən əlaqələndirilmiş şəkildə Saratov hava yollarına məxsus Moskva-Orsk reysi ilə uçuş həyata keçirən təyyarədə baş vermiş qəzada həlak olduğu bildirilən şəxsin Azərbaycan Respublikası vətəndaşı olması araşdırılmışdır.

Milli.Az xəbər verir ki, bu barədə Azərbaycan XİN-nin Mətbuat xidmətinin rəhbəri Hikmət Hacıyev bildirib.

Rusiyadakı aviaqəzanın qurbanları: ən balacası 5 yaşda idi - VİDEO - FOTO

Onun sözlərinə görə, təyyarə qəzasında həlak olduğu bildirilən 5 may 1971-ci il təvəllüdlü, Yevlax rayon sakini Qəhrəmanov Namiq İnayət oğlu Azərbaycan Respublikasının vətəndaşıdır.

XİN-nin sözçüsü qeyd edib ki, məsələ ilə əlaqədar Azərbaycan Respublikasının Rusiya Federasiyasındakı Səfirliyi və aidiyyəti dövlət qurumları Rusiya Federasiyasının müvafiq dövlət təşkilatları ilə təmasdadırlar.

Qeyd edək ki, fevralın 11-də axşam Moskva-Orsk reysi ilə uçaq "Saratov Hava Yolları"na məxsus "An-148" sərnişin təyyarəsi "Domodedovo" hava limanından qalxdıqdan cəmi 4 dəqiqə sonra Moskva yaxınlığında qəzaya uğrayıb. Hissələri Moskvanın Ramenskaya rayonunda yerə düşən təyyarədə 65 sərnişin və 6 heyət üzvü olub. Son məlumatlara görə, təyyarənin qalıqları tapılsa da, 71 nəfərdən sağ qalanı yoxdur.

İlkin İzzət
Milli.Az

Digər maraqlı xəbərlər Milli.Az-ın Facebook səhifəsində