Dünya

Londonda sinaqoqu yandırmağa cəhd edənlər saxlanılıb

16 Aprel 2026 12:06

Baxış: 504

VTB-də minimal faiz dərəcəsi ilə nağd kredit 9.9%-dən

#İNGİLTƏRƏ

Böyük Britaniyanın London şəhərinin şimalındakı Finçli rayonunda yerləşən sinaqoqa hücum cəhdi ilə bağlı iki nəfər saxlanılıb.

Milli.Az xəbər verir ki, CNN-in məlumatına görə, polis hadisə ilə əlaqədar 46 yaşlı kişi və 47 yaşlı qadını Uotford şəhərində həbs edib. Onlar həyat üçün təhlükə yaradan qəsdən yanğın törətməkdə şübhəli bilinirlər.

Məlumata görə, hadisə səhər tezdən baş verib. Tünd geyimli və üzləri maskalı iki şəxs sinaqoqun ərazisinə daxil olaraq binaya kərpic atıb və pəncərələrə ehtimal edilən yanıcı maye olan butulkalar yerləşdirib. Butulkalardan biri sındırılsa da, yanğın baş verməyib və xəsarət alan olmayıb.

Polis hadisəni antisemit nifrət zəminində törədilmiş cinayət kimi qiymətləndirir və ərazidə təhlükəsizlik tədbirlərini gücləndirib.

Sinaqoq nümayəndələri bildiriblər ki, fiziki ziyan olmasa da, insident ciddi emosional təsirlərə səbəb olub.

Qeyd edək ki, bu hadisə Golders Green bölgəsində bir neçə həftə əvvəl baş verən digər insidentdən sonra qeydə alınıb, lakin polis bu hadisələr arasında əlaqə aşkar etməyib.

Ayxan
Milli.Az