29 günlük futbol bayramı başlayır - TƏQVİM

Bu gün futbol üzrə dünya çempionatına start veriləcək.

Milli.Az Apasport.a istinadən bildirir ki, sayca 22-ci mundial Qətərdə baş tutacaq.

Bütün dünyanın diqqət mərkəzində olacaq futbol bayramı 29 gün davam edəcək. Seçmə mərhələni adlayan planetin 31 ən güclü komandası və meydan sahibləri dünyanın ən güclüsünü müəyyənləşdirəcək.

Yeri gəlmişkən, bu, 32 komandanın iştirakı ilə son dünya çempionatı kimi tarixə düşəcək. DÇ-1998-dən başlayaraq ardıcıl 7-ci dəfə mundialda bu sayda komanda aparacaq. Artıq 2026-cı ildə ABŞ, Meksika və Kanadanın qəbul edəcəyi yarışda bu rəqəm 48-ə çatdırılacaq.

İlk dəfə dünya çempionatına ev sahibliyi edəcək Qətərdə 64 qarşılaşma baş tutacaq. 32 komanda hərəsində 4 yığma olmaqla 8 qrupda mübarizə aparacaq.

Bu turnir dünya çempionatları tarixinə ən kompakt mundial kimi düşəcək. Düzdür, oyunların keçiriləcəyi 8 stadion 5 fərqli şəhərdədir. Lakin paytaxt Doha ilə bu şəhərlər arasındakı məsafə o qədər kiçikdir ki, azarkeşlər qrup mərhələsinin 48 oyunundan 30-nı izləyə bilər. Yalnız eyni saatda başlayacaq son turun görüşlərindən biri seçilməli olacaq.

Kompakt çempionatın stadionları arasında ən uzaq məsafə 56 km-dır. Ən yaxın arenaları isə cəmi 5,6 km ayırır. Bütün idman qurğularının yanında metro stansiyalarının olması da azarkeşlərin işini asanlaşdırır. Çempionat üçün qısa müddətdə 39 yeni stansiyanın inşa olunması da buna xidmət edir.

Dünyanın ən güclü adı uğrunda mübarizədə əvvəllər bu titulu qazanan 8 komandadan yeddisi iştirak edəcək. Yalnız dördqat çempion İtaliya final mərhələsinə televiziya ekranlarından baxmalı olacaq. Bu mükafata beş dəfə yiyələnən Braziliya, dörd uğuru olan Almaniya, iki çempionluq yaşayan Argentina, Uruqvay, Fransa, həmçinin hərəyə bir dəfə ən güclü olan İngiltərə ilə İspaniya yenə titul arzusundadır.

Mundialın əsas favoritləri də məhz sabiq çempionlardır. Uruqvay istisna olmaqla digər 6 çempion yenə qızıl medala namizəd hesab olunur. Heç vaxt bu titulu qazanmayanlardan yalnız Niderland, Belçika və Portuqaliyanın adı ara-sıra favoritlərlə yanaşı hallanır. Təbii ki, ikinci dərəcəli namizədlər sırasında. Kriştiano Ronaldo formada olmasa da, Portuqaliyanı arxasınca daşıya biləcəyinə inananlar az deyil. Həm o, həm də XXI əsrin digər ən yaxşısı Lionel Messi üçün son dünya çempionatı olacağını söyləmək olar. Zəngin karyeralarında hər cür titul qazanan cütlük yalnız dünya çempionluğuna həsrətdir.

Avropa və Cənubi Amerika nəhənglərinin favoriti olduğu mundialda sürprizlərin qeydə alınması da qaçılmazdır. Amma bu sürpriz komandalar adətən 1/8, 1/4 final mərhələlərinə qədər irəliləyə bilir. Bu mənada əsas diqqət Afrika yığmalarına yönələcək. Təbii ki, Avropa və Cənubi Amerikanın digər komandaları da təəccübləndirmək gücündədir. Digər konfederasiya təmsilçilərindən böyük uğur gözləmək sadəlövhlük olardı.

İlk dəfə dünya çempionatı yay fasiləsində deyil, mövsümün gedişində keçiriləcək. Bu da futbolçuların ağır mövsümdən sonra yorğun olmaması, əksinə tam formada olacağından xəbər verir. Təbii ki, çempionat öncəsi fasilənin yaranmaması əksər ulduzların zədəsini sağalda bilməməsi üzündən yarışdan kənar qalmasına da səbəb olub.

Futbolsevərlər çempionatın startında ardıcıl 17 gün bayram həyəcanı yaşaya biləcək. 13 gün sürəcək qrup mərhələsində ilki iki yerin sahibləri 1/8 finala adlayacaq.

A qrupu: Qətər, Ekvador, Seneqal, Niderland
B qrupu: İngiltərə, İran, ABŞ, Uels
C qrupu: Argentina, Səudiyyə Ərəbistanı, Meksika, Polşa
D qrupu: Fransa, Avstraliya, Danimarka, Tunis
E qrupu: İspaniya, Kosta-Rika, Almaniya, Yaponiya
F qrupu: Belçika, Kanada, Mərakeş, Xorvatiya
G qrupu: Braziliya, Serbiya, İsveçrə, Kamerun
H qrupu: Portuqaliya, Qana, Uruqvay, Cənubi Koreya

Olimpiya sistemi ilə davam edəcək turnirin bu raundu qrupların ardınca başlayacaq. Yalnız 1/4 final öncəsi mundialda ilk fasilə yaranacaq. 29 günlük futbol bayramı dekabrın 18-də baş tutacaq final matçı ilə yekunlaşacaq.

Qətərdəki mundial yalnız ev sahiblərinin DÇ-lərin final mərhələsindəki debütü ilə əlamətdar olacaq. Digər yığmalar əvvəllər də yarışa qatılıb. Niderland, Qana, Kamerun, ABŞ və Ekvador buraxdıqları DÇ-2018-dən sonra final mərhələsinə qayıdıb. Kanada 36, Uels isə 64 illik həsrətə son qoyub.

Qeyd edək ki, dünya çempionatı tarixdə ikinci dəfə Asiyada keçiriləcək. 2002-ci ildə Yaponiya və Cənubi Koreya mundiala ev sahibliyi edib.

***

DÇ-2022-nin təqvimi

Qrup mərhələsi
A qrupu
I tur, 20 noyabr
20:00. Qətər - Ekvador ("Al Bayt" stadionu)
21 noyabr
20:00. Seneqal - Niderland ("Al Tumama" stadionu)
II tur, 25 noyabr
17:00. Qətər - Seneqal ("Al Tumama" stadionu)
20:00. Niderland - Ekvador ("Xalifa" stadionu)
III tur, 29 noyabr
19:00. Niderland - Qətər ("Al Bayt" stadionu)
19:00. Ekvador - Seneqal ("Xalifa" stadionu)

B qrupu
I tur, 21 noyabr
17:00. İngiltərə - İran ("Xalifa" stadionu)
23:00. ABŞ - Uels ("Ahmad Bin Ali" stadionu)
II tur, 25 noyabr
14:00. Uels - İran ("Ahmad Bin Ali" stadionu)
23:00. İngiltərə - ABŞ ("Al Bayt" stadionu)
III tur, 29 noyabr
23:00. Uels - İngiltərə ("Ahmad Bin Ali" stadionu)
23:00. İran - ABŞ ("Al Tumama" stadionu)

C qrupu
I tur, 22 noyabr
14:00. Argentina - Səudiyyə Ərəbistanı ("Lusail" stadionu)
20:00. Meksika - Polşa (Stadion 974)
II tur, 26 noyabr
17:00. Polşa - Səudiyyə Ərəbistanı ("Edyukeyşn Siti" stadionu)
23:00. Argentina - Meksika ("Lusail" stadionu)
III tur, 30 noyabr
23:00. Polşa - Argentina (Stadion 974)
23:00. Səudiyyə Ərəbistanı - Meksika ("Lusail" stadionu)

D qrupu
I tur, 22 noyabr
17:00. Danimarka - Tunis ("Edyukeyşn Siti" stadionu)
23:00. Fransa - Avstraliya("Al Janub" stadionu)
II tur, 26 noyabr
14:00. Tunis - Avstraliya("Al Janub" stadionu)
20:00. Fransa - Danimarka (Stadion 974)
III tur, 30 noyabr
19:00. Tunis - Fransa ("Edyukeyşn Siti" stadionu)
19:00. Avstraliya- Danimarka ("Al Janub" stadionu)

E qrupu
I tur, 23 noyabr
17:00. Almaniya - Yaponiya ("Xalifa" stadionu)
20:00. İspaniya - Kosta-Rika ("Al Tumama" stadionu)
II tur, 27 noyabr
14:00. Yaponiya - Kosta-Rika ("Ahmad Bin Ali" stadionu)
23:00. İspaniya - Almaniya ("Al Bayt" stadionu)
III tur, 1 dekabr
23:00. Yaponiya - İspaniya ("Xalifa" stadionu)
23:00. Kosta-Rika - Almaniya ("Al Bayt" stadionu)

F qrupu
I tur, 23 noyabr
14:00. Mərakeş - Xorvatiya ("Al Bayt" stadionu)
23:00. Belçika - Kanada ("Ahmad Bin Ali" stadionu)
II tur, 27 noyabr
17:00. Belçika - Mərakeş ("Al Tumama" stadionu)
20:00. Xorvatiya - Kanada ("Xalifa" stadionu)
III tur, 1 dekabr
19:00. Xorvatiya - Belçika ("Ahmad Bin Ali" stadionu)
19:00. Kanada - Mərakeş ("Al Tumama" stadionu)

G qrupu
I tur, 24 noyabr
14:00. İsveçrə - Kamerun ("Al Janub" stadionu)
23:00. Braziliya - Serbiya ("Lusail" stadionu)
II tur, 28 noyabr
14:00. Kamerun - Serbiya ("Al Janub" stadionu)
20:00. Braziliya - İsveçrə (Stadion 974)
III tur, 2 dekabr
23:00. Kamerun - Braziliya ("Lusail" stadionu)
23:00. Serbiya - İsveçrə (Stadion 974)

H qrupu
I tur, 24 noyabr
17:00. Uruqvay - Cənubi Koreya ("Edyukeyşn Siti" stadionu)
20:00. Portuqaliya - Qana (Stadion 974)
II tur, 28 noyabr
17:00. Cənubi Koreya - Qana ("Edyukeyşn Siti" stadionu)
23:00. Portuqaliya - Uruqvay ("Lusail" stadionu)
III tur, 2 dekabr
19:00. Cənubi Koreya - Portuqaliya ("Edyukeyşn Siti" stadionu)
19:00. Qana - Uruqvay ("Al Janub" stadionu)

1/8 final
3 dekabr
49) 19:00. A1 - B2 ("Xalifa" stadionu)
50) 23:00. C1 - D2 ("Ahmad Bin Ali" stadionu)
4 dekabr
52) 19:00. D1 - C2 ("Al Tumama" stadionu)
51) 23:00. B1 - A2 ("Al Bayt" stadionu)
5 dekabr
53) 19:00. E1 - F2 ("Al Janub" stadionu)
54) 23:00. G1 - H2 (Stadion 974)
6 dekabr
55) 19:00. F1 - E2 ("Edyukeyşn Siti" stadionu)
56) 23:00. H1 - G2 ("Lusail" stadionu)

1/4 final
9 dekabr
58) 19:00. 53-cü oyunun qalibi - 54-cü oyunun qalibi ("Edyukeyşn Siti" stadionu)
57) 23:00. 49-cu oyunun qalibi - 50-cı oyunun qalibi ("Lusail" stadionu)
10 dekabr
60) 19:00. 55-ci oyunun qalibi - 56-cı oyunun qalibi ("Al Tumama" stadionu)
59) 23:00. 51-ci oyunun qalibi - 52-ci oyunun qalibi ("Al Bayt" stadionu)

1/2 final
13 dekabr
61) 23:00. 57-ci oyunun qalibi - 58-ci oyunun qalibi ("Lusail" stadionu)
14 dekabr
62) 23:00. 59-cu oyunun qalibi - 60-cı oyunun qalibi ("Al Bayt" stadionu)

3-cü yer uğrunda oyun
17 dekabr
63) 19:00. 61-ci oyunun məğlubu - 62-ci oyunun məğlubu ("Xalifa" stadionu)

Final
18 dekabr
64) 19:00. 61-ci oyunun qalibi - 62-ci oyunun qalibi ("Lusail" stadionu)

Milli.Az