Azərbaycanda şəxsi aptek açmaq üçün nə tələb olunur?

Milli.Az-ın məlumatına görə, o, Day.Az saytına yazdığı məktubda aptek açmaq üçün lazım olan sənədlər, dövlət rüsumu və sairlə bağlı məlumat verilməsini xahiş edir.
Səhiyyə Nazirliyinin mətbuat xidmətinin rəhbəri Anar Qədirli Azərbaycanda həm hüquqi, həm də fiziki şəxslərin aptek açmaq hüququnun olduğunu bildirib:

"Aptek açan zaman fəaliyyəti tənzimləyən müəyyən normativlərə əməl edilməlidir. Apteklər ayrıca binalarda və ya qeyri-yaşayış sahəsində açılmalıdır (zirzəmilər istisnadır). Aptekin fəaliyyət göstərəcəyi obyektdə dərmanların saxlanılması üçün bütün lazımi şərait yaradılmalıdır. Orada sanitar qovşaq olmalı, kondisioner quraşdırılmalı, telefon xətti çəkilməli, preparatların yığılması üçün lazımi mebel quraşdırılmalıdır".

A.Qədirlinin sözlərinə görə, aptekin ümumi ərazisi 75 kvadrat metrdən az olmamalıdır. Tibbi preparatların hazırlanması üçün isə ərazisi minimum 35 kvadrat metr olan ayrıca otağın olması vacibdir.

"Aptekin üzərində "APTEK" yazısı və saat asılmalıdır. Orada sanitar-epidemioloji normalara əməl olunmalı, fövqəladə vəziyyətlərə hazırlıq məqsədilə təhlükəsizlik tədbirləri görülməlidir", - deyən A.Qədirli bildirib ki, bütün bunların yaradılmasından sonra fəaliyyətə başlanılması üçün lisenziya alınmalıdır. Lisenziyanı Səhiyyə Nazirliyi verir: "Bunun üçün şəxsiyyət vəsiqəsi, diplom, əmək kitabçası, vergi qeydiyyatı şəhadətnaməsi, tibbi arayış və sair sənədlər tələb olunur. Bundan başqa, 5500 manat məbləğində dövlət rüsumu da ödənilməlidir".

Apteklərdə tibbi preparatların satışı və hazırlanmasına, uşaq yeməkləri və dietik qidaların, optikanın, müalicəvi mineral suların, kosmetika və dövlət qeydiyyatı olan digər analoji məhsulların satışına icazə verilir: "Aptekin rəhbəri bu sahədə ali və ya orta təhsilə, həmçinin 5 illik iş təcrübəsinə malik olmalıdır".

Milli.Az