Pirşağıya nə vaxt qaz veriləcək?

Sabunçu rayonunun Pişağı qəsəbəsində qaz problemi var. Qəsəbənin bir neçə ərazisində - Meşəçilik massivi adlanan ərazidə, "Sovxoz-2" yaşayış sahələri və qaçqın qəsəbəsinin sakinləri qaz üzünə həsrət qalıblar. Sakinlər Milli.Az xəbər portalına ünvanladıqları şikayətdə bildirilər ki, qaz məsələsi onların əzəli problemləridir. Ya tamamilə olmur, ya da o qədər zəif təzyiqlə verilir ki, istifadə etməyə yaramır. Şikayətçilər vəziyyətin dözülməz olduğunu bildirirlər: "Soyuq havalarda evdə oturmaq olmur. Evi qızdırmaq üçün ümid elektrik enerjisinə qalır. Elektrik enerjisindən istifadə etdikdə isə sayğaclar o qədər pul yazır ki, sonra bunun öhdəsindən gələ bilmirik. Sabunçu rayon Qaz İdaərisnə, Rayon İcra Hakimiyyətinə müraciət etməyimizə baxmayaraq, problem öz həllini tapmır" - deyə şikayətdə vurğulanır. 

Problem də məlumdur, səbəb də...

Sabunçu rayon Qaz İdarəsinin qəza xidmətinin rəisi İ.Əliyev Milli.Az xəbər portalına açıqlamasında problemdən xəbərdar olduqlarını bildirdi. Xidmət rəisinin sözlərinə görə, hazırda problemi həll etmək imkanları yoxdur: "Həmin qazsız ərazilər əvvəllər Abşeron rayonunun ərazisi olub. Bir neçə ay əvvəl Sabunçu rayonuna verilib. Sözügedən Meşəçilik massivi, Sovxoz-2 ərazisinə də qaz xətti Abşeron rayon Qaz İdarəsindən gəlir. Bizimlə onlar arasında Digah kəndi ərazisində sayğac var. Əgər Abşeronda təmir gedirsə, qaz verilmirsə, bu problemin səbəbkarı biz deyilik. Hələlik onların bizə verdiyi qazla kifayətlənmək məcburiyyətindəyik. Hazırda isə Abşeron ərazisində müəyyən problemlər var".

"Bir az səbrli olsunlar"

İ.Əliyev problemin tezıliklə həll olunacağına söz verdi: "Bütün bunlara baxmayaraq, sakinləri qazsıq qoymaq fikrində deyilik. Hazırda biz öz qaz xəttimizi çəkirik. Xətt çəkildikdən sonra həmin ərazilər də tərəfimizdən qazla təmin olunacaq. Hazırda işlər gedir, tikinti şirkətləri ilə danışıqlar aparılıb. Ümid edirəm ki, yaxın 2-3 ay ərzində problem yoluna qoyulacaq. Sakinlər bir az səbrli olsunlar".

Anar Məmmədov
Milli.Az