Heydər Əliyev Fondundan şamaxılılara daha bir hədiyyə

Qurban bayramı ərəfəsində Heydər Əliyev Fondu Şamaxı rayonunda keçirilən "Təmiz şəhər, rahat nəqliyyat" layihəsinə dəstək olaraq 2 ədəd müasir tipli avtobus, 3 ədəd məişət tullantıları daşıyan avtomobil bağışlayıb.

AzərTAc xəbər verir ki, avtobuslar əhalinin Sabir qəsəbəsinə, yeni istifadəyə verilmiş Diaqnostoka mərkəzinə, avtovağzala, "Az Samand" zavoduna və digər yerlərə asan və rahat gediş-gəlişinə imkan yaradacaqdır.

Heydər Əliyev Fondunun Şamaxıda keçirilən "Təmiz şəhər, rahat nəqliyyat" layihəsinə verdiyi növbəti dəstəklə əlaqədər təşkil olunmuş təqdimat mərasimini giriş sözü ilə açan rayon icra hakimiyyətinin başçısı Nazim İsmayılov bildirib ki, son illərdə rayonda təkcə Heydər Əliyev Fondunun vəsaiti ilə 780 şagird yerlik 5 yeni məktəb binası tikilib istifadəyə verilib, 480 yerlik texniki, hamanitar, təbiət fənləri üzrə liseyinin, 200 şagird yerlik Qaleybuğurd kənd orta məktəbinin binaları əsaslı təmir edilib. Keçən il Fondun təşəbbüsü və dəstəyi ilə Şahamat məktəbi yüksək səviyyədə əsaslı təmir edilərək müasir inventar və avadanlıqla təchiz olunub.
Hazırda Heydər Əliyev Fondunun təşəbbüsü ilə qədim Şamaxı məscidi əsaslı təmir və bərpa edilərək yenidən qurulur, habelə Uşaq İncəsənət Məktəbi üçün yeni bina tikilir. Ötən il Fondun vəsaiti ilə gənc məcburi köçkün ailələri üçün 16 mənzilli yeni yaşayış binası da tiklib istifadəyə verilib. Keçən ilin dekabrında rayonda ictimai nəqliyyatın yaxşılaşdırılması məqsədilə Fond tərəfindən rayona 4 ədəd xaricidə istehsal edilmiş avtobus hədiyyə olunub.

Tədbirdə digər çıxış edənlər bütün bunlara görə Heydər Əliyev Fondunun prezidenti, YUNESKO-nun və İSESKO-nun xoşməramlı səfri, hamı üçün əziz və doğma olan Mehriban xanım Əliyevaya dərin minnətdarlıqlarını bildiriblər. Natiqlər Prezident İlham Əliyevin rəhbərliyi ilə ölkəmizdə sosial-iqtisadi sahələrdə qazanılan böyük uğurlardan iftixar duyduqlarını bildirib, Azərbaycanın bütün sahələrdə daha da inkişafı və çiçəklənməsi naminə şamaxılıların bundan sonra dövlət başçısının ətrafında sıx birləşərək var-qüvvə ilə çalışacaqlarını söyləyiblər.

Tədbirdə Heydər Əliyev Fondunun nümayəndəsi İlqar Mustafayev çıxış edərək Fondun prezidenti Mehriban xanım Əliyevanın şamaxılılara salamını və bayram təbriklərini çatdırıb.

Sonda Heydər Əliyev Fondu tərəfindən göndəriliən avtomaşınların açarları sürücülərə təqdim edilib.

Milli.Az