Meyitxanaya atılan azərbaycanlı necə dirildi?

Asim Rəsulovun 35 yaşı var. Qazaxıstanda başından aldığı zərbədən sonra görmə qabiliyyətini itirib, sərbəst yeriyə bilmir. Dörd ildir sağalmaq üçün mübarizə aparır.

Anası Nazilə Rəsulova APA TV-yə deyib ki, onların ailə faciəsi 2004-cü ildə, həyat yoldaşının ölümü ilə başlayıb. Həmin vaxt Asim və qardaşı Rasim bir neft şirkətində işləyirmişlər. 2005-ci il dekabrın 23-də Qazaxıstana ezamiyyətə göndərilən Rasim mindiyi təyyarənin qəzaya uğraması nəticəsində həyatını itirir. Qardaşının ölümündən bir il sonra isə Asim ixtisara düşür. 2008-ci ildə "Tekfen Holding"-də özünə iş tapan Asim Qazaxıstanın Atrau şəhərinə göndərilir. İşini yaxşı bacardığından, onu Levent Nihat Bozqurd adlı Türkiyə vətəndaşı Atraudan Astanaya - öz şirkətinə dəvət edir. Asim razılaşır. Ancaq şərt qoyur ki, burAda çox işləyə bilməyəcək, anası Bakıda təkdir. Bir müddətdən sonra Asim öz rəisinə Bakıya qayıtmaq fikrində olduğunu deyir, şirkətdən alacağını istəyir

Asim Rəsulov deyir ki, şirkət pulunu nağd verməyib: "Dedilər ki, əvvəlcə Karakandaya gedib, əşyalarımı yığım, pul lazım olduğunu desəm də, vermədilər".

Asim yaşadığı yerə qayıdır. Kirayə qaldığı evin qapısını açanda, başına küt alətlə vururlar. Huşunu itirdikdən sonra sinəsindən bıçaqlanır. Onu iki gün sonra yaşayış yerindən uzaqda, qarın içində tapırlar.

"2010-cu il fevralın 2-də Asimi tanıyan bir nəfər azərbaycanlı bizə zəng etdi ki, Asimi vurublar, ölüb".

Asimi yiyəsiz meyit kimi morqa atıblar. Sonra morqda ürəyinin döyündüyünü biliblər. Həkimlərin səyi nəticəsində Asim həyata qayıdıb. İki ay komada qalıb. Ailəsi Qazaxıstana gedir: "Ərizə yazdım ki, uşağı bu günə qoyana ən ağır cəzanı istəyirəm. Orada 5-6 dəfə polislər gəldi. Asim heç kimi tanımırdı, danışmırdı. Danışa bilmirdi. Polislər gəlirdi ki, özü danışsın, görək bunu kim vurub, niyə eləyib. Bu da danışa bilmirdi deyə, götürdük gəldik Azərbaycana".

Asim 3 il ildir, nə danışır, nə hərəkət edir. Uzun müddət aparılan müalicə nəticəsində irəliləyişə nail olub. Bakıya gəldikdən sonra, Qazaxıstan hüquq-mühafizə orqanları iki dəfə Asimgilə zəng edib, amma özü danışa bilmədiyi üçün onlara izahat vermək mümkün olmayıb.

Asim komada olanda Levent Nihat onun əmək haqqının qalığını ailəsinə ödəyib.

Asim Levent Nihatın şirkətində sənədsiz işləyirmiş. Anası deyir ki, özləri birtəhər dolanırlar.. Amma Asimin xəstəliyi olmasaydı...

"Gözü görmür, gəzmir".

Nazilə Rəsulovanın sözlərinə görə, Asimin İsraildə sağalmasına 60-70 faiz zəmanət verilir. O, Bakıya yeriyərək gələ bilər, gözləri də görər. Ancaq bu müalicə üçün 80 min dollar lazımdır.

Milli.Az