Paytaxtda benzinə limit qoyulub? - FOTO

"Yeni Müsavat"ın əməkdaşı bu məsələni araşdırmaq üçün bir neçə YDM-də olub

Xəbər verdiyimiz kimi yanvarın 1-dən etibarən "Avro- 3" ə keçidlə bağlı ölkədə yanacağın qiymətinin qalxma ehtimalı var. Bu barədə Standartlaşdırma, Metrologiya və Patent üzrə Dövlət Komitəsinin sədri Ramiz Həsənov jurnalistlərə bildirib.

Bu arada gəzən söz-söhbətlərə görə, yanacaqdoldurma məntəqələrində benzini limitlə verirlər. Bu barədə bizimlə söhbət edən sürücülər yanacaqdoldurma məntəqələrində benzini istədikləri qədər deyil, limitlə aldıqlarını söylədilər.

Məsələ ilə bağlı paytaxta fəaliyyət göstərən "LUKoil" və "Azpetroll" şirkətlərinin bir neçə yanacaqdoldurma məntəqəsinə baş çəkib qiymətlərlə və sürücülərin səsləndirdiyi iddialarla maraqlandıq. Metronun "Əhmədli" stansiyası yaxınlığında yerləşən "LUKoil" yanacaqdoldurma məntəqəsinin baş direktoru Şahin (soyadını açıqlamadı.H.K) bu barədə onlarda hər hansı məlumat olmadığını və yanacağa heç bir limit qoyulmadığını bildirdi: "Bizdə yanacağın qiymətinin artırılacağı ilə bağlı hər hansı məlumat yoxdur. Yanvarın 1-dən də qiymətlər qalxsa, təbii ki, biz də yeni qiymətlərə keçəcəyik. Amma hazırda qiymətlərdə heç bir artım yoxdur. O ki qaldı sürücülərin səsləndirdiyi fikirlərə, qeyd edim ki, bizim yanacaqdoldurma məntəqəsində heç bir limit yoxdur. Hər kəs istədiyi qədər yanacaq ala bilər. Bu fikirlər şayiədir ".

Metronun "Xalqlar dostluğu" stansiyası yaxınlığında yerləşən "Azpetrol" yanacaqdoldurma məntəqəsinin baş direktoru Adəm Fətullayev də səsləndirilən iddiaların doğru olmadığını bildirdi: "Bizdə yanacaqla bağlı heç bir problem yoxdur. İstənilən sürücü istədiyi qədər benzin ala bilər. Bu barədə hər hansısa məhdudiyyət, limit qoyulmayıb. Ancaq bir istisna hal var ki, biz kauçuk qablarda yanacaq satışına qadağa qoymuşuq. Çox güman ki, sürücülər də bu qadağanı limit kimi başa düşüblər".

Yanvarın 1- dən "Avro- 3" ə keçidlə bağlı yanacağın qiymətinin artırılacağına gəlincə isə Adəm Fətullayev dedi ki, bu haqda bizdə heç bir məlumat yoxdur: "Bu haqda bizim heç bir informasiyamız yoxdur. Ona görə də heç nə deyə bilmərəm. Ümumiyyətlə, rəsmi icazə olmadan bizim hər hansısa açıqlama vermək hüququmuz yoxdur. Yaxşı olar ki, məsələ bizim baş ofisimizə müraciət edəsiz". Sürücülər isə yanacağın bahalaşması ilə bağlı yayılan informasiyadan narahat olduqlarını bildirdilər.

Milli.Az