Aldığı planşeti qaytarmaq istədi, satıcı ağacın dibinə atdı

Sosial şəbəkələrdə fəaliyyət göstərən "Smart Saat" adlı onlayn mağaza ilə bağlı vətəndaş narazılığı gündəmə gəlib. Belə ki, mağazadan planşet sifariş edən şəxs aldığı məhsulun elan edilən texniki göstəricilərlə uyğun gəlmədiyini iddia edir.

Milli.Az xəbər verir ki, şikayətçinin bildirdiyinə görə, o, 29 noyabr tarixində mağazanın "Instagram" səhifəsində paylaşılan planşet elanını gördükdən sonra satıcı ilə əlaqə saxlayıb və məhsulun 1 TB yaddaşa malik olub-olmamasını dəqiqləşdirib. Satıcıdan müsbət cavab aldıqdan sonra həmin gün sifariş verilib.

Lakin planşeti istifadə etməyə başlayarkən vətəndaş məhsulun yaddaş həcminin fərqli olduğunu aşkarlayıb. Onun sözlərinə görə, cihaz cəmi 512 GB yaddaşa malik olub:

"Quraşdırma zamanı şübhələndim. Daha sonra texniki göstəricilərə baxdım və gördüm ki, məhsul bir terabayt deyil", - deyə o bildirib.

Vətəndaş narazılığını mağazaya dəfələrlə çatdırdığını və məhsulu geri qaytarmaq istədiyini deyir. Onun iddiasına görə, bu tələb qəbul edilməyib:
"Dedim ki, heç olmasa qiymətini uyğunlaşdırın. Cavab verdilər ki, açılmış məhsul geri qaytarılmır".

Şikayətçi əlavə edib ki, planşeti qaytarmaq üçün mağazaya şəxsən müraciət etdikdə daha sərt münasibətlə üzləşib. Onun sözlərinə görə, əməkdaşlar planşeti mağazada qoyacağı təqdirdə çölə atacaqlarını bildiriblər. Məhz buna görə o, mağazaya daxil olduğu andan etibarən bütün prosesi videoya çəkib.

İddialara əsasən, daha sonra planşet mağazanın qarşısında ağacın dibinə qoyularaq şəkli çəkilib və müştəriyə göndərilib:

"Şəkil göndərib dedilər ki, gəlib məhsulunuzu buradan götürün", - deyə vətəndaş qeyd edib.

"Smart Saat" onlayn mağazasının əməkdaşı ilkin olaraq planşetin çölə qoyulması ilə bağlı deyilənləri inkar etsə də, sonradan verdiyi açıqlamada məhsulun mağazadan çıxarılaraq bayıra qoyulduğunu təsdiqləyib.

Məsələ ilə bağlı Azad İstehlakçılar Birliyinin sədri Eyyub Hüseynov bildirib ki, onlayn alış-veriş zamanı bu cür problemlərlə tez-tez rastlaşılır. Onun sözlərinə görə, internet üzərindən yayımlanan reklamlar bəzən real məhsulla üst-üstə düşmür və bu, istehlakçılar üçün ciddi çətinlik yaradır.

Ekspert vurğulayıb ki, mövcud qanunvericilik istehlakçıların hüquqlarını qoruyur. Belə ki, "İstehlakçıların hüquqlarının müdafiəsi haqqında" qanuna əsasən, onlayn ticarət zamanı vətəndaş keyfiyyətsiz və ya sifarişə uyğun olmayan məhsulu 14 gün ərzində dəyişmək və ya geri qaytarmaq hüququna malikdir.

Asya
Milli.Az