Dərinin qocalmasını bu üsullarla aradan qaldırın

Yaş artıqca ən çox narahatlıq yaradan problemlərdən biri də dəridə yaşlanma əlamətlərinin və qırışların yaranmasıdır.

Milli.Az axşam.az-a istinadən bunu ləngidən və cildin təravətini uzun müddət saxlamağa imkan verən üsulları təqdim edir.

Əlcəklə işləyin

Əlləri qorumağın başlıca yolu onları nəmləndirməkdir. Lakin gündəlik görülən işlər, qabları yumaq cildi zədələyir. Su və kimyəvi maddələrlə təmasda olduqca əllərdə çatlar yaranır və dərisi qurumağa başlayır. Bunun üçün əlləri zədələyəcək işlərlə məşğul olarkən əlcəklərdən istifadə etməyə çalışın.

Günəş kremindən istifadə edin

Xüsusən günəşli havalarda bu kremlərdən istifadə mütləqdir. Günəşin ultrabənövşəyi şüaları cildi zədələməklə qalmır dəridə ləkələrin əmələ gəlməsinə və qurumasına səbəb olur. Bu səbəbdən günəşin təmas edəcəyi bölgələrə günəş kremi çəkin. Bununla yanaşı nəmləndirici kremlərdən istifidəni də unutmayın.

Bol maye içmək

Dəridə quruluq və qaşınmaya səbəb ola biləcək müxtəlif səbəblər var. Bunun üçün ilk növbədə həkimə müraciət etmək tövsiyə olunur. Bununla yanaşı maye qəbulu da mütləqdir. Xüsusən günəşli havalarda cild daha çox mayeni bədəndən xaric etdiyi üçün orqanizmdəki su balansını qorumaq şərtdir.

Tərkibində A, C, E vitaminləri olan qidalar qəbul edin

Maye itkisi təkcə dəridə müşahidə olunmur. Saçlar da quruduqca və xarici amillərə məruz qaldıqca qırılır və tökülməyə başlayır. Saç liflərini gücləndirmək üçün ispanaq, yağlı balıqlar, yaşıl çay, avokado, nar, fındıq istehlak etməyə üstünlük verin.

Qaşlarınızı çatmayın və üzünüzü büzməyin

Gün ərzində müxtəlif duyğular yaşayırıq. Gülürük, ağlayırıq və ya əsəbi olduğumuza görə istəmədən də olsa, uzun müddət qaşları çatırıq. Bu isə üzdə qırışların yaranmasını sürətləndirir. Qaşlarınızı çatmamaq üçünsə, ilk növbədə stresi aradan qaldırmaq lazımdır. Bunun üçün dərin nəfəs alın və üz məşqləri, yoqa ilə məşğul olun. Eyni zamanda, yatarkən üzü üstə deyil, arxası üstə yatın. 

Milli.Az