Milli Demokrat (Bozqurd) Partiyası: “Bir qrup şəxsin partiya adından çıxış etməsi məzhəkədir”

"Aprelin 24-də Azərbaycan Demokrat Partiyasının konfrans zalında bir qrup şəxs toplaşaraq Azərbaycan Milli Demokrat (Bozqurd) Partiyasının (AMDEP) adından çıxış edib, guya "partiya Böyük Məclisinin toplantısının" keçirildiyini bildiriblər". Azərbaycan Milli Demokrat (Bozqurd) Partiyasının Milli.Az xəbər portalına göndərilən bəyanatında belə deyilir.
AMDEP bildirir ki, Azərbaycan Respublikasının bütövlüyü və suverenliyi əleyhinə olan xarici qüvvələr tərəfindən Azərbaycanda siyasi sabitliyin pozulması və dövlətimizin imicinin aşağılanması məqsədini güdən planlar iflasa uğrayıb: "Bu iflasın səbəblərindən biri də AMDEP-in, milli mənafeyi öndə tutan siyasi qurum kimi həmin siyasi oyunlara qoşulmaması oldu. Bundan irəli gələrək AMDEP-i xarici sifarişçilərin oyunlarına qatmaq, beynəlxalq anti-türk qüvvələrin Azərbaycandakı marionetləri ilə birgə addımlağa sövq etmək üçün partiyaya qarşı kənar qüvvələrin hücumları başlanıb. AMDEP-ə qarşı təxribatlardan biri də məhz partiyanın parçalanması oyunu idi ki, bu məkrli oyunu partiyanın böyük bir hissəsi dəf etmiş oldu. AMDEP bir daha bildirir ki, partiya Dünya Türkçü qüvvələrinin "sorosçu" və ya "Qərbin kuklaları" kimi dəyərləndirdiyi siyasi intriqanların yanında olmayacaq, həmin qüvvələrlə olmaq istəyən marginal bir qrupun özünü "millətçi", "bozqurdçu" və ya "AMDEP-çi" adlandırması absurd məzhəkədən başqa bir şey deyil".

 Bəyanatda o da deyilir ki, Azərbaycan Milli Demokrat (Bozqurd) Partiyasının sonuncu Böyük Məclisi aprelin 15-də keçirilib. Partiyanın həmin tarixdəki Böyük Məclisinin toplantısının legitimliyi partiya Nizamnaməsinə uyğun olaraq partiya  MNTK-sı tərəfindən təsdiqlənib: "Partiya Nizamnaməsinə və Azərbaycan Respublikası qanunvericiliyinə uyğun olaraq fəaliyyətini və tədbrlərini həyata keçirməkdə davam edir. Beləliklə, partiya "sorosçu", "Batının kuklaları" ilə birgə cinahda olmaq istəyən və milliyətçiliyə aidiyyatı olmayan bir qrup şəxsin aprelin 24-də nümayiş etdirmək istədiyi şousunu iflasa uğramış məzhəkə kimi dəyərləndirir".

Milli.Az