Siyasət

Ersin Tatarın Xocalı BƏYANATI - "Soyqırımın ağrıları hələ də qəlbimizdə hiss olunur"

27 Fevral 2025 11:27

Baxış: 768

#XOCALI SOYQIRIMI #QUZEY KIBRIS TÜRK CÜMHURİYYƏTİ

Quzey Kıbrıs Türk Cümhuriyyətinin (KKTC) Prezidenti Ersin Tatar Xocalı faciəsinin 33-cü ildönümü ilə əlaqədar bəyanat yaylb.

Milli.Az news24.az-a istinadən xəbər verir ki, bəyanatda Xocalı faciəsinin bəşəriyyətin və insanlığın tarixində qara ləkə olduğu bildirilir.

O, qardaş Azərbaycan xalqının hiss etdiyi ağrı-acının Quzey Kıbrıs türklərinin də qəlbində hiss edildiyini vurğulayıb.

"33 il əvvəl Ermənistan silahlı qüvvələri Azərbaycandan olan 613 qardaş-bacımızı, o cümlədən qocalar, qadınlar və uşaqları vəhşicəsinə qətlə yetirib, mindən çoxu əsir götürülüb. Azərbaycan xalqının məruz qaldığı soyqırımından sonra qardaşlarımız tarixin yeni səhifəsini açdılar: 2020-ci ilin 44 günlük müharibəsi tarixi Qələbə ilə başa çatdı, Qarabağın, o cümlədən Xocalının və Şuşanın azad edilməsinə gətirib çıxardı", bəyanatda bildirilib.

Ersin Tatar Xocalı soyqırımının ildönümündə Prezident İlham Əliyevə və bütün Azərbaycan xalqına dərin hüznlə başsağlığı verib. O, Azərbaycanla həmrəylik və birliyin davam edəcəyinə əminliyini bildirib.

Milli.Az