Bakıda mühakimə edilən ermənilərlə bağlı Kremldən açıqlama

Ümumiyyətlə, uzun illər müxtəlif cəhdlərə baxmayaraq, təəssüf ki, dayandırılması mümkün olmayan Ermənistan-Azərbaycan münaqişəsindən, bütövlükdə bu prosesdən danışsaq, bu, Bakı və İrəvan arasında çoxlu sayda nəhəng humanitar problemlərə gətirib çıxarıb.

Milli.Az axar.az-a istinadən bildirir ki, bu sözləri Rusiya XİN rəsmisi Mariya Zaxarova erməni jurnalistin Bakıda hərbi cinayətlərdə ittiham olunan erməni əsilli şəxslərin məhkəməsi ilə bağlı yalanlardan və böhtanlardan ibarət provokativ sualına cavab olaraq bildirib.

"Bax, elə məhz buna görə üçtərəfli proses çərçivəsində Rusiya, Azərbaycan və Ermənistan liderləri, o cümlədən humanitar məsələlərin həllinin zəruriliyi barədə razılığa gəliblər. 31 oktyabr 2022-ci il tarixli bəyanatda deyilir ki, sitat: "Tərəflər humanitar məsələlər bloku da daxil olmaqla, qalan məsələlərin təcili həllinə yönəlmiş əlavə səylər göstərməyə razılaşıblar". Sitatın sonu.

Biz bu sazişlərə sadiqliyimizi təsdiq edirik. Biz qaçqınların hüquqlarının, mədəni, tarixi və dini irsin qorunması, hərbi əməliyyatlar zamanı itkin düşənlərin axtarışı, bütün saxlanılan şəxslərin dəyişdirilməsi və qaytarılması baxımından azərbaycanlı və erməni tərəfdaşlarımıza lazımi köməklik göstərməyə hazırıq. Əminəm ki, bu, Bakı ilə İrəvan arasında etimad və dialoq mühitinə töhvə verəcək. Bəli, başa düşürəm ki, siz əvvəllər də olduğu kimi, həmişə "Düyməni basın, nəticə əldə edin" formatında cavab istəyirsiniz. Amma elə məsələlər var ki, onilliklər ərzində daha da mürəkkəbləşib. Onilliklər ərzində onlar həll olunmadı. Onlar yalnız daha da mürəkkəbləşdi. Və bu suallar eyni seriyadandır. Bunlar bir anda peyda olmadılar. Onlar onilliklər boyu formalaşan problemlər zəncirinin bir hissəsidir. Ona görə də bu, qeyd etdiyim reseptlə həll olunmalıdır", - Zaxarova erməni jurnalistə deyib.

Milli.Az