Siyasət

Ermənistan ordusu böyük itkilər verəcək - Növbəti MÜHARİBƏ RİSKİ ARTIR

28 Noyabr 2022 18:20
Baxış: 6 454

"Ermənistan bilərəkdən sülh prosesini pozur, danışıqları çökdürür, qüvvədə olan sülh formatlarının zəifləməsinə çalışır. İstər-istəməz burada boşluqlar yaranır və o boşluqlardan kim necə bacarırsa elə də istifadə edir. Ocümlədən də elə sülhməramlılar".

Bunu Milli.Az-a açıqlamasında politoloq Tofiq Abbasov deyib.

O bildirib ki, Ermənistan hakimiyyəti dərk etməlidir ki, ondan alət kimi istifadə edirlər:

"Birinci dəfə deyil ki, Azərbaycan Rusiya sülhməramlılarına xəbərdarlıq edir, toponimlərin erməniləşdirilməsi, separatçıların Laçın dəhlizi ilə Xankəndinə və nəzarətlərindəki digər ərazilərə daşınmasına göz yumması, Qarabağa qeyri-qanuni səfərlərə şərait yaratması ilə bağlı bütün bu məlumatlar bizdə var. 

Azərbaycan istər-istəməz sülhməramlıların buradakı komandanlığına eləcə də Rusiya tərəfinə narazılığımızı bildirmişik, xəbərdarlığımızı etmişik. Amma ermənilər çalışırlar ki, belə bir şərait yaratsınlar ki, güya "status-kvo" pozula bilər. Ermənistan indi açıq-aşkar Fransanın yedəyinə oturub və çalışır elə bir situasiya yaratsın ki, güya məsələlər həllini tapmayıb.

Ermənistan dünya birliyi qarşısında vaxtaşırı iki tezisi səsləndirir:

⚫️ Azərbaycan güya Ermənistanın ərazi bütövlüyünü pozub

⚫️ Azərbaycan Qarabağ ermənilərinə dair güya soyqrım siyasətini yeritməyə hazırlaşır

Və bu, onlara əsas verir ki, onlar hərbi hazırlıqlarını genişləndirsinlər. Fransa, Hindistan, İran, o biri-bu biri ölkələrdən silah-sursat alsınlar. Ona görə, Prezident İlham Əliyev ADA-da keçirilən konfransda dedi ki, 3 formatdan biri Ermənistanın ucbatından artıq qüvvədən düşdü. 

Yəni Emanuel Makronun Brüssel formatına qatılması onu mənasız etdi. Qalır Moskva və Vaşinqton formatları. Dövlət başçısı bu çıxışı zamanı bütün xəbərdarlıqlarının hamısını etdi və bildirdi ki, ermənilər əgər bir də hədlərini aşsalar, qeyri-qanuni hazırlıqlar həyata keçirib, bizə qarşı təxribat törətmək istəsələr, orada lokal antiterror əməliyyatları qaçılmaz olacaq. Ümumiyyətlə, proseslər buna doğru gedir.

Biz artıq istəsək də, istəməsək də ki, vəziyyət qeyri-müəyyən olmasın, sülhlə bağlı aydın bir mənzərə yaransın, bu, tək bizdən asılı deyil. Biz artıq öz sözümüzü demişik. Ermənistan hakimiyyəti sadəcə özünü qanmazlığa qoyub, ya da qanmaq istəmir ki, onu alət kimi istifadə edirlər. 

Yəni Makron faktiki erməni silahını ortaya atır ki, bir yandan Türkiyəyə təzyiq göstərsin, Azərbaycana problem yaratsın və ümumiyyətlə özünün enerji təhlükəsini aradan sovuşdursun. Çünki Fransa hazırda elə bir məqamdadır ki, onun enerji təhlükəsizliyi ümumiyyətlə yox səviyyəsindədir. 

Fransada elektrik enerji istehsal edən atom elektrik stansiyaların demək olar ki, hamısı xammalsız qalıb. Buna görə Fransa həm İtaliyadan, həm Türkiyədən inciyir. Güya bu iki ölkə onun enerji təhülkəsizliyini pozur, ona təhlükə törədir. Ona görə də çalışır ki, öz acığını Türkiyədən və Azərbaycandan bu şəkildə çıxsın.  

Ona görə də mən istisna etmirəm ki, hərbi toqquşmalar baş verəcək. Amma bu dəfə də hərbi toqquşmalar baş verərsə, Ermənistan yenə də o itkilərinin acısını yaşamalı olacaq, özü də artıq bu dəfə lap güclü tərzdə. Hesab edirəm ki, Rusiya özü də burada ikibaşlı oyun oynayır. Onların bu mövqeyi düzgün bir yanaşma deyil. 

Çünki əgər Ermənistan Moskvanın müttəfiqidirsə, biz də onların müttəfiqiyik. Necə olur ki, Moskva iki müttəfiq arasında fərq qoyur?! Və bilə-bilə ki, Azərbaycan burada örtülü oyun oynamır, Azərbaycanın dediyi sözlər beynəlxlaq qanunlar çərçivəsindədir, Azərbaycanın istədiyi sülhdür, yenə də erməni separatizminə rəvac verməyə çalışır. O cümlədən Fransaya, o cümlədən də Amerikadakı bəzi ermənipərəst qüvvələrə. 

Bu proseslərdə bəllidir ki, kim oyunun ağ zolağındadır, kim qara zolağındadır. Ermənistan hələ də elə bilir ki, güya ki, Azərbaycana revanş yaşada bilər. Amma əslində bu çox böyük yanlışlıqdır və mən hətta deyərdim ki, faciəvi bir yanlışlıqdır. Bu yol nə Ermənistanı, nə də onun arxasında duran, ona havadarlıq edən qüvvələri heç bir yerə aparmır". 

Təhməz Əsədov
Milli.Az

 

Azernews Newspaper

XƏBƏR LENTİ

Copyright © 2023 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.

Global site tag (gtag.js) - Google Analytics