BMW 4 Series yavaş-yavaş kamuflyaj örtüyünü atır - FOTO

BMW 4 Series kupesinin növbəti nəslinin yekun sınaqlarına başlanıb. Nürbirqrinq trekində idarəetmənin qiymətləndirilməsi üzrə sınaqdan çıxarılan prototip kamuflyaj örtüyünün bir hissəsini itirib. Belə ki, qızğın müzakirələr obyektinə çevrilmiş nəhəng radiator barmaqlığının üzərindəki örtük, demək olar ki, tamamilə götürülüb. İlin sonuna kimi satışa çıxacaq kupe bir müddət bundan öncə yenilənmiş Audi A5 Coupe və Mercedes-Benz C-Class Coupe modelləri ilə rəqabət aparacaqdır.

Milli.Az autograph.az-a istinadən bildirir ki, bir müddət bundan öncə, alman istehsalçısının mətbuat xidməti yeni nəslin 4 Series kupesinin sınaqların son mərhələsinə qədəm qoyduğunu bildirərək, yeni modelin kamuflyajlı prototipinin şəkillərini dərc edərək, yeni kupe haqqında bəzi təfərrüatları açıqlamışdı.

Məsələn, 4 Series modeli 3 Series sedanından 57 millimetr alçaq olacaqdır. Kupenin ağırlıq mərkəzi də 21 millimetr aşağı düşəcəkdir. Avtomobilin aerodinamik müqavimət əmsalı 0,015 azaldılıb. Kuzovun sərtliyinin artırılması üçün kapotun altında , alt hissədə və asqı elementlərinin bağlanması nöqtələrində gücləndiricilər quraşdırılıb.

4 Series kupesi 3 Series sedanından şassi ilə də fərqlənəcəkdir - söhbət təkcə asqı və sükan mexanizminin idman tənzimlənmələrindən getmir. Kupedə ön təkərlərin mənfi maillik bucağı artırılıb və digər sükan qolları quraşdırılıb, arxa tərəfində isə təkər izi 23 millimetr artırılıbdır. Kupe standart olaraq 18-düymlük təkər diskləri ilə təchiz ediləcəkdir.

Ekstremal BMW M4 modelini nəzərə almasaq, 4 Series ailəsinin ən güclü versiyası BMW M440i xDrive kupesi olacaqdır. Kupe M340i sedanından tanış olan 374 at qüvvəli 3,0-litrlik turbomühərrik və 48 voltluq startyor-generator ilə təchiz ediləcəkdir. 11 at qüvvəli elektromotor sürətlənmənin ilk saniyələrində mühərrikə yardım edəcək və start-stop sisteminin tərkib hissəsi olacaqdır. Bundan başqa, kupe 8-pilləli avtomatik transmissiyanı, ön oxda muftası olan tam ötürmə sistemini və elektronika idarə olunan arxa M Sport differensialını əldə edəcəkdir.

BMW 4 Series modelinin daha sadə versiyaları haqqında məlumat modelin rəsmi təqdimatı zamanı açıqlanacaqdır. Yeni kupenin debütü bir aydan sonra baş tutmalıdır. Kupenin ardınca modelin yumşaq tavanlı versiyası və beşqapılı Gran Coupe modifikasiyası işıq üzü görəcəkdir.

Milli.Az