Maraqlı

Slovakiya parlamentində "tort etirazı" başa çatıb

21 Fevral 2020 22:33
0 Şərh     Baxış: 670

Fevralın 18-dən Slovak parlamentində "tort etirazı" keçirən altı müxalifətçi deputat öz aksiyalarına son qoyub.

Milli.Az AZƏRTAC-a istinadən bildirir ki, çıxışlar üçün nəzərdə tutulan əsas kürsünü zəbt edən altı deputat oraya tort qoyaraq parlament iclaslarının adəti qaydada keçirilməsinə imkan vermirdilər. Aksiyanın başa çatmasından əvvəl hökumət başçısı, sosial-demokrat Peter Pelleqrini iclas zalına gətirilmiş əlavə kürsüdən çıxış edərək, siyasətçilərin bu addımını kəskin tənqid edib. O, demokratiyanın mühüm sütunlarından biri olan parlamentə qarşı həyata keçirilən aksiyanı hörmətsizlik kimi dəyərləndirib, bu addımla həmin deputatların demokratiya haqqında yanlış təsəvvürlərini çılpaqlığı ilə göstərdiklərini ifadə edib. Baş Nazirin çıxışı başa çatmamış, etirazçı deputatlar könüllü şəkildə zəbt etdikləri əsas kürsüdən uzaqlaşıblar.

Liberal düşərgəni təmsil edən altı müxalifətçi deputat mətbuat açıqlamasında öz etirazlarını bir neçə gün sonra baş tutacaq parlament seçkiləri ərəfəsində parlamentin xüsusi iclası ilə əsaslandırıblar. Həmin iclasın gündəliyinə əsasən təqaüdçülərə əlavə ödənişlərin verilməsi, uşaq pulunun artırılması və digər imtiyazlar barədə məsələlər müzakirəyə çıxarılmalıdır. Tələm-tələsik çağırılan bu iclası qeyri-qanuni hesab edən etirazçıların fikrincə, hökumət seçkilərin bir addımlığında keçirilən həmin iclasda qəbul edilən qərarlarla seçiciləri ələ almaq məqsədi güdür. Eyni zamanda, seçkilərdən sonra formalaşacaq yeni hökumət bu öhdəlikləri maliyyələşdirməkdə çətinlik çəkəcək.

Xüsusi iclasın çağırılması üçün hakimiyyətdə olan sosial-demokratlar sağçı-ekstremist "Bizim Slovakiya Xalq Partiyası"nın (LSNS) dəstəyini alıblar. Etirazçılar parlamentə gətirdikləri tortu isə əks düşərgələri təmsil edən iki partiyanın "siyasi nikahı" üçün təbrik kimi təqdim ediblər. Altı deputat iki gün medianın diqqətini öz aksiyalarına çəkə bilsələr də, parlamentin qərarına təsir etmək imkanına malik olmayacaqlar.

Milli.Az

loading...

Şərh yaz:

0 Şərh:

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.