McDonalds-da rəzalət: Çıxın çölə, buranı tərk edin - VİDEO - FOTO

Lütfən, restoranı tərk edin! Yeməyinizi bitirməyə lüzum yoxdur! Siz qaydaları pozursunuz, müştərilərimizi narahat edirsiniz! Çıxın çölə!

Amerikalı Yossi Qallo ABŞ-ın Cənubi Karolina ştatındakı Mirtl-Biç şəhərində yerləşən McDonalds restoranından qovulub.

Daha doğrusu o, nahara qonaq etdi evsiz-eşiksiz, küçədə yaşayan qoca ilə birlikdə restoranda "arzuolunmaz şəxslər" sayılıblar.

Yossi Qallo srağagün yaşanmış olayın videosunu sosial şəbəkələrdə paylaşıb. Videoya indiyədək on milyonlarla insan baxıb.

Yossinin dediyinə görə, Mirtl-Biçdəki restorana yollananda orada, binanın qarşısında evsiz-eşiksiz, yoxsul qocanı görüb.

"Onun ac olduğunu anladım, "Yemək istəyirsən?" soruşdum. Çəlimsiz qoca "Hə" dedi. Onunla birliklə restorana girdik. Qocaya McDonalds menyularından birini sifariş verdim, sonra özümə də yemək götürdüm. Yeməyə başladıq. Amma az sonra restorana polis gəldi. Sən demə, polis zabiti olan bu xanımı restoranın meneceri çağırıbmış", - Yossi Qallo deyib.

Videokadrlarda görünür ki, qadın polis zabiti evsiz qocadan və Yossi Qallodan restoranı tərk etmələrini istəyir.

"Bu qocadan şikayət var. Bir neçə nəfər dedilər ki, o, burada pul dilənir, insanları narahat edir", - polis zabiti deyib.

Yossi Qallo iddiaların yalan olduğunu, qocanın pul dilənmədiyini, onu restorana yemək üçün gətirdiyini söyləsə də, zabit Qallonun sözlərini qulaqardına vurur.

Sinirlənmiş Qallo restoranın menecerinə qışqıraraq deyib: "Siz insan deyilsiniz! İnsanlığınızı itiribsiniz! Ac insanın yemək yeməsinə mane olursunuz! Halbuki, onun yeməyinin pulunu ödəmişəm və bu adam da sakitcə oturub yemək yeyir. Belə çıxır ki, yoxsulun, kasıbın, evsizin McDonalds-da pulu ilə yemək yeməyə ixtiyarı yoxdur?!"

Restorandan çıxarılan Yossi Qallo evsiz qocaya deyib: "Gəl, otur mahınıma, gedək evdə yemək yeyək".

Milli.Az

Videonu izləmək üçün şəklə klikləyin: