97 yaşı var, məşuqəsi ilə evlənəcək

Sinqapur məhkəməsi 97 yaşlı bir kişini əqli cəhətdən sağlam və oğlunun on illərdir münasibətdə olduğu qadınla evlənməsinə mane olmaq cəhdlərinə baxmayaraq, öz evlilik qərarlarını vermək hüququna malik olduğunu elan edib.

Milli.Az-ın məlumatına görə, kişinin adı açıqlanmayıb. O, 1950-ci ildə evlənib və bu nikahdan üç oğul böyüdüb. 1971-ci ildə katibəsi ilə münasibətə başlayıb və sonradan ondan bir övladı olub. Mediada yayılan məlumatlara görə, həyat yoldaşı ərinin münasibətindən xəbərdar olub, lakin 2014-cü ildə vəfat edənə qədər onunla qalıb.

Arvadının ölümündən iki il sonra kişi məşuqəsini onunla yaşamağa dəvət edib və 2021-ci ildə rəsmi nikah bağlamaq niyyətində olduğunu bildirib. Bu müddət ərzində ailəsi ilə münaqişə daha da şiddətlənib.

İkinci oğul atasının səriştəsiz elan edilməsi üçün ailə məhkəməsinə iddia qaldırıb. O, iddia edib ki, 2017-ci ildə yıxıldıqdan sonra atasında demensiya inkişaf edib və bu da onu qərar qəbul etmək qabiliyyətindən məhrum edib və partnyorunun təsiri altında qalıb.

Oğul məhkəmədə israr edib: "Atam təkbaşına vacib qərarlar qəbul etmək qabiliyyətinə malik deyil".

Buna cavab olaraq yaşlı kişi qarşılıqlı iddia qaldırıb. O, vəsiyyətnaməsində dəyişiklik edərək ikinci oğlunu və nəvəsini çıxarıb və 3,8 milyon Sinqapur dollarının (təxminən 2,97-3 milyon ABŞ dolları) və 1960-cı illərdə qurulan kimya şirkətinin aktivlərinin geri qaytarılmasını tələb edib. O, həmçinin nəvəsini evindən çıxarmağa cəhd edib.

Tibbi müayinələr göstərib ki, kişidə yalnız yaşla bağlı yüngül idrak geriləməsi və qısamüddətli yaddaş problemləri müşahidə olunub, lakin o, hərəkətlərini anlamaq və evlilik və əmlakla bağlı qərarlar qəbul etmək qabiliyyətini qoruyub saxlayıb.

Həkimlər belə qənaətə gəliblər: "O, qərarlarının nəticələrini tam başa düşür".

Hakim Şobha Nair oğulun mövqeyinin uyğunsuzluğunu qeyd edib. Xüsusilə, atasının iddia edilən qabiliyyətsizliyinə baxmayaraq, o, 2019-cu ildə - demensiyaya səbəb olduğu iddia edilən yıxılmadan sonra - atasının şirkətin baş direktoru təyin olunmasına razılıq verib.

Məhkəmə ikinci oğlunun iddiasını rədd edərək, 97 yaşlı kişinin qadınla təxminən 50 ildir münasibətdə olduğunu və qadının onu manipulyasiya etdiyinə və ya əmlakını ələ keçirməyə çalışdığına dair heç bir dəlil olmadığını vurğulayıb.

Lakin iş hələ bitməyib: ikinci oğul artıq apelyasiya şikayəti verib. Beləliklə, kişi evlənməzdən əvvəl məhkəmənin yekun qərarını gözləməli olacaq. /Lent.az

Milli.Az