150 il ərzində insanların bədəninin hərarəti niyə aşağı düşüb?

ABŞ-da tədqiqatçılar bağırsaq mikrobiomunda baş verən dəyişikliklərə görə insanların bədən hərarətinin son 150 il ərzində aşağı düşdüyünü müəyyən ediblər. 

Milli.Az lent.az-a istinadən bildirir ki, Miçiqan Universitetinin alimlərinin məqaləsi "American Journal of Respiratory and Critical Care Medicine" jurnalında dərc olunub.

Bədən istiliyi insandan insana dəyişə bilər, lakin ümumilikdə insan bədəninin orta bazal temperaturu 1860-cı illərdən bəri bilinməyən səbəblərdən aşağı düşüb.

Bioloqlar sepsis (bəzən qan zəhərlənməsi də deyilir) ilə xəstəxanaya yerləşdirilən 116 xəstənin tibbi qeydlərindən istifadə ediblər. Xəstələrin bağırsaq mikrobiotası çox müxtəlif olub.

"İstənilən iki xəstənin genomları 99 faizdən çox eyni olub, bağırsaq bakteriyalarının tərkibi isə sözün əsl mənasında 0 faiz üst-üstə düşə bilər", - tədqiqat rəhbəri Keyl Bonqers söyləyib.

Alimlər bağırsaq bakteriyalarının tərkibindəki dəyişikliklərin xəstələrin bədən istiliyinə təsir etdiyini müəyyən ediblər. Əvvəllər sübut edilib ki, sepsisdə sağ qalma şansı bədən istiliyindən asılıdır.

Lachnospiraceae bakteriyaları istiliklə ən yaxından əlaqəli olub. Onların istehsal etdiyi metabolitlərin qan dövranına daxil olduğu və bədənin immun reaksiyasına və maddələr mübadiləsinə təsir etdiyi məlumdur. Nəticələri təsdiqləmək üçün alimlər normal siçanları bağırsaq bakteriyalarını məhv etmiş eyni siçanlarla müqayisə ediblər.

Steril siçanlarda sepsisə temperatur reaksiyası daha zəif olub. Temperatur reaksiyasındakı fərqlər insanlarda olduğu kimi eyni bakteriya ailəsi (Lachnospiraceae) ilə güclü əlaqələndirilib.

Tədqiqat bağırsaq mikrobiomunun bədən istiliyinin tənzimlənməsində lazımınca qiymətləndirilməmiş rolunu vurğulayır və son 150 il ərzində insan bədən istiliyində 0,3 dərəcə Selsi düşməsini izah edə bilər. Alimlərin qeyd etdiyi kimi, son 150 il ərzində insan genetikası əhəmiyyətli dərəcədə dəyişməyib, lakin qidalanma, gigiyena və antibiotiklərdə baş verən dəyişikliklər bağırsaq bakteriyalarımıza böyük təsir göstərib.

Milli.Az