Sağlamlıq

Ekspertlər təyyarədə koronavirusa yoluxma riskini qiymətləndirib

13 Sentyabr 2020 21:25
Baxış: 528

Ekspertlər sərnişinlərin təyyarədə koronavirusa yoluxma riskini qiymətləndirib.

Milli.Az AZƏRTAC-a istinadən bildirir ki, ekspertlərin fikrincə, sərnişinlərin təyyarənin göyərtəsində bir neçə saat bir-birinə çox yaxın oturmalarına baxmayaraq, uçuş zamanı COVID-19 xəstəliyinə yoluxma riskləri hamının düşündüyü qədər də çox deyil.

"Biz təyyarə salonunda sərnişinlərin kütləvi yoluxması hallarına rast gəlməmişik. Adətən virus daşıyıcısının bilavasitə yanında oturan şəxs zərər çəkir", - deyə Con Hopkins Universitetinin Sağlamlıq Təhlükəsizliyi Mərkəzinin böyük elmi işçisi və ABŞ-ın İnfeksionistlər Cəmiyyətinin nümayəndəsi Ameş Adalya bildirib.

Məsələ bundadır ki, laynerlərdə yüksək effektli havalandırma sistemləri quraşdırılıb. "Bu filtrlər hava yolu ilə yayılan mikrobların 99,9 faizini tutmağa qadirdir. Salonun havalandırılması mahiyyət etibarilə sterildir və virus hissəcikləri daşımır", - deyə Beynəlxalq Hava Nəqliyyatı Assosiasiyası məlumat verib. Ümumdünya Səhiyyə Təşkilatının nümayəndəsi Devid Nabarro da yaxşı filtrlər sayəsində təyyarədə səyahətin "nisbətən təhlükəsiz" olduğu fikri ilə razılaşıb.

Təyyarə göyərtəsində yoluxma ehtimalı bir sıra digər tədbirlər sayəsində də minimallaşır. Belə ki, hərarəti yüksək olanlar uçuşa buraxılmır. Bundan başqa, aviakompaniyaların əksəriyyəti sərnişinləri əllərini tez-tez yumağa və dezinfeksiya etməyə, həmçinin maska taxmağa çağırır. Bəzi aviadaşıyıcılar isə sosial məsafəni qorumaq məqsədilə salonda sərnişinlərin sayını məhdudlaşdırır.

Milli.Az

loading...

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.