Tavanız bu vəziyyətdədirsə, dərhal atın

Mətbəxdə ən çox istifadə olunan yapışmaz teflon tavalar zamanla aşındıqda ciddi sağlamlıq problemlərinə yol açır. Mütəxəssislər vurğulayırlar ki, tavanın dibində müəyyən izlər və ya dəyişikliklər gördükdə ondan istifadəni dərhal dayandırmalısınız.

Milli.Az xəbər verir ki, yeyilmiş və cızılmış teflon tavaların qoruyucu təbəqəsi zədələndikdə sağlamlığınıza ciddi zərər verə bilər. Bu tavalar yeməklərinizə zərərli kimyəvi maddələr və mikroplastik hissəciklər sızdıraraq, uzunmüddətli dövrdə xərçəng riskini artıran "səssiz təhlükə"yə çevrilir.

Təhlükə əlamətləri hansılardır?
Boz metalik parıltı və ya altdakı metalın üzə çıxması.

Dərin qaraya bənzər cızıqlar, soyulma və ya qabarma.

Rəng dəyişikliyi (saralma, qəhvəyi rəngə boyanma).

Bu izlər qoruyucu teflon təbəqənin tamamilə aşındığını və altdakı alüminium və ya metal səthin ortaya çıxdığını göstərir. Bu vəziyyətdə yeməklərinizə mikroplastik hissəciklərin, PFAS qrupuna aid qalıcı kimyəvi maddələrin və ağır metal qalıqlarının bulaşma riski yüksəlir.

Hansı riskləri daşıyır?

Yeməklərə mikro və nanoplastik keçidinə səbəb ola bilər (tək bir cızıq belə minlərlə hissəcik ifraz edə bilir).

Yüksək temperaturda (180°C-dən yuxarı, xüsusən 260°C keçdikdə) toksik qazlar ayırır ki, bu da "Teflon qızdırması" adlanan qripə bənzər simptomlara və tənəffüs problemlərinə yol aça bilər.

Vücudda yığılan kimyəvi maddələr hormonal balansın pozulmasına, qaraciyər-böyrək çatışmazlığına və bəzi xərçəng növlərinin yaranmasına zəmin hazırlayır.

Müasir teflon tavaların çoxunda PFOA maddəsi olmasa da, örtük aşındıqda ortaya çıxan PTFE hissəcikləri və mikroplastiklər hələ də ciddi narahatlıq mənbəyidir.

Tavanı nə vaxt dəyişməli?
Tavanın səthində yuxarıda qeyd olunan izlərdən hər hansı biri varsa, onu dərhal dəyişin. Onu təmir etməyə çalışmaq və ya istifadəyə davam etmək böyük risk daşıyır.

Tavanın ömrünü necə uzatmalı?
Metal alətlərdən qaçın: Metal spatula, çəngəl və ya qaşıqdan qətiyyən istifadə etməyin; yalnız taxta və ya silikon ləvazimatlara üstünlük verin.

Boş halda qızdırmayın: Tavanı boş vəziyyətdə yüksək odda saxlamayın.

Zərif təmizlik: Sərt telli süngər və ya aşındırıcı yuyucu vasitələrlə sürtməyin; yumşaq süngər və incə təmizləmə üsulundan istifadə edin.

Lalə Qüdrətova
Milli.Az