Xərçəng halları niyə atır? - SƏBƏBLƏR

Ümumdünya Səhiyyə Təşkilatı məlumatına görə, hər il dünyada təxminən 20 milyon yeni xərçəng halı qeydə alınır, 10 milyona yaxın insan isə bu xəstəlik səbəbilə həyatını itirir. 

Milli.Az xəbər verir ki, türkiyəli onkoloq Dilşən Çolak bildirib ki, müasir tibbdə xərçəng artıq tək bir xəstəlik kimi deyil, müxtəlif bioloji xüsusiyyətlərə malik xəstəliklər qrupu kimi qiymətləndirilir.

Onun sözlərinə görə, bu səbəbdən hər bir xəstəyə fərdi yanaşma vacibdir.

Həkim qeyd edib ki, xərçəngin müalicəsi yalnız fiziki deyil, həm də psixoloji və sosial aspektlər nəzərə alınaraq aparılmalıdır və bu baxımdan multidissiplinar yanaşma mühüm rol oynayır.

Erkən diaqnozun əhəmiyyətinə toxunan mütəxəssis vurğulayıb ki, xəstəliyin ilkin mərhələdə aşkarlanması müalicə şansını xeyli artırır. O əlavə edib ki, xüsusilə süd vəzi, uşaqlıq boynu və kolorektal xərçənglər skrininq proqramları vasitəsilə erkən mərhələdə aşkar edilə bilər.

Həkimlər xərçəngin yalnız müalicə edilən deyil, həm də qarşısı alına bilən xəstəlik olduğunu bildirirlər. Sağlam qidalanma, müntəzəm fiziki aktivlik və zərərli vərdişlərdən uzaq durmaq riskləri əhəmiyyətli dərəcədə azaldır.

Risk faktorları arasında isə ultra emal olunmuş qidaların tez-tez qəbulu, siqaret, alkoqol istifadəsi, hərəkətsiz həyat tərzi və piylənmə xüsusi yer tutur.

Son illərdə xərçəng müalicəsində də mühüm yeniliklər qeydə alınıb. Həkimlərin sözlərinə görə, artıq klassik kimyaterapiya ilə yanaşı, hədəfli müalicələr, immunoterapiya və "ağıllı dərmanlar" geniş tətbiq olunur. Bununla belə, hər bir müalicə üsulu bütün xəstələr üçün uyğun hesab edilmir və terapiya planı fərdi qaydada müəyyənləşdirilir.

Mütəxəssislər ailə dəstəyinin və ictimai maarifləndirmənin də vacib olduğunu qeyd edərək, hər kəsi yaş və risk qrupuna uyğun olaraq mütəmadi tibbi müayinələrdən keçməyə çağırırlar.

Mina Mikayılova
Milli.Az