Metabolizmi sürətləndirmək və yağ yandırmaq üçün qəhvə necə içilməlidir?

Düzgün qəhvə istehlakı orqanizmin daha çox enerji xərcləməsinə, tonusun artmasına və sağlam çəki balansının qorunmasına kömək edir. Artıq qəhvə sadəcə bir sabah ritualı deyil, düzgün yanaşma ilə metabolizmanın təbii köməkçisinə çevrilə bilər. Lakin hər fincan qəhvə eyni dərəcədə faydalı deyil. Maksimum nəticə əldə etmək üçün onu nə vaxt və necə içməyi bilmək vacibdir.

Milli.Az xəbər verir ki, kofein mərkəzi sinir sistemini stimullaşdırır, ürək döyüntülərini artırır və bədənin daha çox enerji sərf etdiyi bir proses olan termogenezi gücləndirir. Məhz buna görə qəhvə içdikdən sonra özünüzü daha gümrah hiss edirsiniz və metabolizmanız müvəqqəti olaraq fəallaşır.

Çəki atmaq üçün qəhvəni necə içmək lazımdır?
Şəkər, karamel şərbətləri və şirin qaymaqlar qəhvənin faydasını sıfıra endirir. Onlar qanda şəkərin miqdarını kəskin artıraraq yağ toplanmasına şərait yaradır. Dadı yumşaltmaq istəyirsinizsə, bir az darçın, hil və ya bir damcı bitki mənşəli süd əlavə edə bilərsiniz.

Yağ yandırma effektini görmək üçün qəhvəni günün ilk yarısında, oyandıqdan 30-60 dəqiqə sonra və ya fiziki fəaliyyətdən 30 dəqiqə əvvəl içmək lazımdır. Ac qarına qəhvə içmək mədəni qıcıqlandıra bilər, axşam qəhvəsi isə yuxunu pozaraq metabolizmaya mənfi təsir edər.

Ən yaxşı seçimlər qara filtr qəhvə, espresso və ya amerikanodur. Bu içkilər minimum kalori ehtiva edir və aktiv maddələri qoruyur. "3-ü 1-də" və ya hazır həll olunan qəhvələrin metabolizm üçün demək olar ki, heç bir faydası yoxdur.

Optimal miqdar gündə 3 fincana qədərdir. Həddindən artıq kofein əks təsir göstərə bilər: stress, iştah artımı və hormonal balansın pozulması. Mülayimlik əsas şərtdir.

Qəhvə sehirli çubuq deyil, sadəcə bir katalizatordur. O, yalnız balanslı qidalanma, idman və kifayət qədər yuxu ilə birləşdirildikdə ən yaxşı nəticəni verir.

Lalə Qüdrətova
Milli.Az