Sağlamlıq

"Sakit uşaqlar "hədiyyə" deyil, "qırmızı bayraq"dır" - Açıqlama

6 Sentyabr 2025 22:00

Baxış: 1 573

VTB-də minimal faiz dərəcəsi ilə nağd kredit 9.9%-dən

#CƏMİYYƏT #SAĞLAMLIQ

Çox sakit və "rahat" körpə hər zaman sağlamlıq göstəricisi olmaya bilər.

Milli.Az xəbər verir ki, bunu uşaq masajçısı və hərəkət inkişafı üzrə ekspert İqor Novokrinitski söyləyib.

Onun dediyinə görə həddindən artıq yuxululuq, yeməyə çətin oyadılma, zəif əmizdirmə, çəki artımında problem, gur səsə, işığa və ya narahatlığa reaksiya verməmək sinir sisteminin yetkinləşməməsinin əlaməti ola bilər.

Körpə 1-1,5 aylığında ananın üzünə baxmırsa, 2-3 aylığında cavab gülümsəməsi yoxdursa, səslə diqqət çəkməyə çalışmırsa, bu da narahatedici siqnaldır.

Bəzi uşaqlar sadəcə təbiətən sakit və flegmatik ola bilsə də, inkişaf yaş normasına uyğun getmədikdə problem yaranır. Belə hallarda hipotoniya, motor və nitq inkişafında gecikmə, eləcə də autizm spektr pozuntularının ilkin əlamətləri mümkündür.

Ekspertin sözlərinə görə, endokrin xəstəliklər, xüsusən anadangəlmə hipotiroidizm, həmçinin eşitmə və görmə zəifliyi də körpənin həddən artıq sakit görünməsinə səbəb ola bilər. O, xüsusi diqqət tələb edən əlamətlər sırasında 4-6 həftəsində gülümsəməmək, 1,5 aylığında başını qaldırmamaq, 3 aylığında səsə dönməmək, 7,5 aylığında çevrilməmək, 9-10 aylığında oturmamaq və sürünməmək, 12 aylığında qalxmağa cəhd etməmək və ilk səslərin, sözlərin olmamasını sadalayıb.

Novokrinitski bildirib ki, körpə oyunlara maraq göstərmirsə, valideynə sevinc ifadə etmirsə, əşyaları öyrənməyə çalışmırsa, bu da inkişaf geriliyinin göstəricisi ola bilər.

Mütəxəssis valideynlərə vaxt itirmədən nevroloqa müraciət etməyi məsləhət görüb, çünki uşağın ilk ayları onun gələcək inkişafı üçün həlledicidir.

İsmayıl
Milli.Az