Ayaqqabısız idman təhlükəlidir? - Podoloqlardan XƏBƏRDARLIQ

Son illərdə fitnes dünyasında ayaqqabısız məşqlər - istər yoqa, istər funksional idman növləri populyarlıq qazanıb. Bu yanaşmanın tərəfdarları ayaq əzələlərinin daha yaxşı aktivləşdiyini, bədənin özünü daha dərindən hiss etməyə kömək etdiyini və balansın yaxşılaşdığını iddia edirlər. Lakin ayaqqabısız idman həqiqətən sağlamdırmı?

Milli.Az xəbər verir ki, mütəxəssislər bu suala cavab verir.

Ayaqqabısız gəzmək sağlamdırmı?

Podoloq Con Roy Senatore bildirir ki, ayaqqabısız məşq zamanı insan ayaqları kəsiklərə, qabar və su toplamasına məruz qala bilər. Bu səbəbdən də corab, içlik və ya idman ayaqqabıları ilə qorunmaq vacibdir.

"Mən yalnız qumlu sahildə qaçarkən və ya yoqa zamanı ayaqqabısız olmağı məqbul hesab edirəm. Bununla kifayətlənmək lazımdır," - deyə o vurğulayır.

Ayaqqabısız gəzmək insanda torpaqla təmasdan doğan xoş hisslər oyatsa da, bu yalnız nadir hallarda faydalı ola bilər.

Yüksək keyfiyyətli ayaqqabılar komfort, amortizasiya və zədələrdən, infeksiyalardan, ekstremal temperaturlardan qoruma təmin edir. Uşaqlıqdan bəri ayaqqabısız gəzməyə alışmamış insanlar üçün ayaqsız gəzmək təhlükəlidir, çünki ayaqlar dəstək və qorunmaya uyğunlaşıb.

Nyu-Yorkdan podoloq Bred Şeffer qeyd edir:

"Biz elə bir cəmiyyətdə yaşayırıq ki, corab və ayaqqabı geyinmək adi haldır. Ona görə də ayaqqabısız gəzməyə alışmamışıq".

Ayaqqabısız idman etmək olarmı?

Bu, fəaliyyətin növündən və şəxsin ayaq sağlamlığı vəziyyətindən asılıdır.

Xüsusilə şəkərli diabet xəstələrinə ayaqqabısız gəzmək qətiyyən tövsiyə edilmir - hətta evdə belə. Diabetik neyropatiya adlı ağırlaşma ayaqlarda hissiyyat itkisinə səbəb ola bilər və bu da təhlükəli nəticələrə yol aça bilər.

Ayaqqabısız təmiz bir otlu sahədə və ya çimərlikdə gəzmək qəbulediləndir. Lakin orada belə kəsik və digər təhlükələr mövcud ola bilər. Şəhər ərazisində isə ayaqqabısız gəzmək son dərəcə təhlükəlidir - şüşə qırıqları, zibillər, iynələr və digər zərərli əşyalarla qarşılaşmaq mümkündür. Yay aylarında asfaltın həddindən artıq qızması isə ayaqları yandıra bilər.

Həkimlər ayaqqabısız qaçmağı da məsləhət görmürlər. Çünki yüksək intensivlikli məşqlər zamanı ayaqlara güclü dəstək və amortizasiya tələb olunur. Ayaqqabısız qaçış sümüklərdə qırığa səbəb ola bilər.

Qaçış zamanı ayaqlara düşən yük, bədənin çəkisindən dəfələrlə çox olur - bu, həm sürətdən, həm də səthin xüsusiyyətindən asılıdır.

Kənan
Milli.Az